Ka Semi Final wa nyngkong ka Durand Cup 2024 hapyrdi ka Shillong Lajong FC waka North-East United FC daw pynman ka ha J.N. Stadium ha ka 26 tarik uni u bnai heiwa neiliang ka sorkar jylla da pynkhreh kyrpang ko neibynta katai ka sngi.
Ki Ticket da pynlait ynne ka sngi heiwa ki Phase 1 Ticket wa dai Online da lut ki hapoh 6 minit. Neitæ da dai leh ha ki thaw dai Ticket wa em ha Laitumkhrah, Polo wa Police Bazaar wei da booh won sa kawi ha U Soso Tham Auditorium yow yarap dai.
Neiliang ka yung krehkaam ka Deputy Commissioner, East Khasi Hills, ki Magistrate wa ki pulit da ya krehlang ki deilang wa ki dorbar chnong yow pynman yei dai Ticket kawa lai bait khlem da mih i kulmar neibynta ki paidbah kiwa da yang yow thied Ticket.
Ynne waroh ki Ticket kiwa dai Online wa Offline da lut ki plak neibynta ki 15,000 ngut kiwa chniam ha ka J.N. Stadium, hajrong ini, da pynkhreh da ki Fan Parks ha ka 26 tarik ha kiwa boon ki thaw ka Shillong wa ha ki District Headquarter yow ye ki paidbah u pait ha ki Screen wei daw em leh kiwa tem wa put na ka Meghalaya Grassroots Music Program (MGMP) wei daw booh leh ki dukan dai baam ha kini ki Fan Parks.
Kini ki Fan Park toh kiwa da booh ha Mawlai Madan Heh (Stadium), ha R.V. Lyngdoh Parking Lot (mar pyrchah ka Golf Retreat), ha Malki Ground, Umpling Maw-arling, Laitumkhrah Police Point Parking Lot wa ha NEHU Campus.
Ya ka Durand Cup ye leh wow pait ha ka SonyLiv OTT wa ki TV Channel kam u Sony Sports 2 & 3.
Discussion about this post