U Symbood Montri Rangbah wa pait ya ka chnat Kaam Pohyung (Police), u Prestone Tynsong da ong u wa chwa wow wai biang ya u sarok ha Them Ïewmawlong, da emkaam wow bichaar wei wow thooh bniah wym ktah ko yei suk i saaiñ.
U Prestone da pyntip u yeini hawa jubab ynne yeiwa kylli pynrap u MLA ka VPP na North Shillong, u Adelbert Nongrum hajrong i khynnia ki sarok hapoh sor Shillong.
Hawa wanrah yei yukylli, u Adelbert da ong u wa i daw bah yong i sahkut kari ha ka thaaiñ Motphran wa Them Ïewmawlong toh wa dang khang bait ya u sarok na Ïewmawlong cha Bimola, heiwa da kylli u leh na ka sorkar hajrong i khang sah ya utai u surok kattu la palat 6 snem.
Hawa jubab hajrong ini, u Symbood Montri Rangbah da ong u wa ka sorkar da dep ko wow chong yalang wei yaklam kammon wow wai biang ya u sarok ha Them Ïewmawlong. Wei da ong u leh wa ka sorkar emkaam ko wow tip chwa lada mut ko wow wai biang ya utai u sarok neibhah wa ye u ktah yei suk i saaiñ, wei da pyntip chooh chooh wa ha ki kajiak sngi wow wan daw tip deiwa bniah wei ka sorkar daw chim ko yei rai.
Discussion about this post