U MLA ka Mowkaiaw, u Nujorki Sungoh ynne hapoh ka yung dorbar da e khublei u ya ka sorkar wa da pynlait poisa ko yow chna soo tylli ki sarok hapoh ka Constituency u kiwa le tylli na ka PMGSY wa kawi napoh ka RIDF.
Tangwa da ong u wa dang em sa uwi u sarok uwa tip kam u NJB Road uwa lai na Nartiang cha Barato wei man u u sarok wa emkaam bha uwa jrong 35.4 Km uwa lai lyngba 3 tylli ki Constituency nadooh ka Nartiang, Raliang wa Mowkaiaw wei uni u sarok da lai u lyngba u 27 tylli ki chnong kiwa em kamwa 30,000 ngut kiwa chong chnong kiwa boon toh ki warep.
Ha uni u sarok da em leh du ar tylli ki PHC kawi toh ha Nartiang katwa kawi toh ha Barato wei yow lai cha kini ki thaw sumaar da hap ki wow lai na uni u sarok uwa da sih bha wei kiwa boon katni da yait ki wow pynemkaam oo ha i bynta wa sih.
Ya uni u sarok da bhah ha ki le bynta, kitæ na 1 Km hadooh 13 Km uwa da yoh poisa u chna wei dadep wow pynchna. I bynta wa 20.4 Km hadooh 35.4 Km leh da dep pynchna. Tangwa nadooh 14 Km hadooh 20.4 Km toh iwa da ieh khlem pynchna wei khlem da booh ka mang tangka.
Da ong u wa ki paidbah kattæ yow lait u lai na ini i bynta, da hap ki wow lai na uwi won u sarok wa jrong bha.
Kamtæ u Nujor da kyntu u ya u Montri ka chnat PWD (Rds) wow booh ka mang tangka yow pynchna noh ya ini i bynta wa sah iwa 7 Km donhi.
U Prestone Tynsong uwa pait ya ka chnat PWD (Rds) hawa e yei jubab da ong u wa ka chnat daw pynchna noh ko ya ki bynta wa da sih manda kut u slap katwa ya ini i bynta wa 7 Km wa da sih bha, ka chnat daw phah ko yei tyrwa neibynta u yoh poisa ha u snem mang tangka 2024-25.
Discussion about this post