Ka NEHU Deen Dayal Upadhyay Community College for Skill Development, Wahiajer, Jowai da pynman ko ya ka e sikai chna syntu wei wow pynphooh pynphieñ yei dur i dar deilang wa u sñiooh wa tip kam ka Skill Up-gradation Training Programme “Floral Design & Bouquet Batch Making/Makeup & Hair Styling”.
Ya kani ka e sikai da pynman san sngi nadooh ka 26 hadooh ka 30 tarik uni u bnai heiwa da wan ya chimbynta da ki spah ngut ki khon khynroo na ki thaaiñ waphær waphær napoh ka Ri-loom Jaiñtia.
Ya kani ka e sikai da wan wow wai da u Waheh Chnong ka Wahiajer, u Sanwotki Laloo kam u kongsan deiwa emlang u Prof. H. Lamin (Rtd) Founder, Principal I/c, kam u symbod kongsan, wei ha ka sngi wow pynkut won da wan da u Amit Gupta, Deputy Registrar (Academic), NEHU kam u kongsan wa u Dr. Dashwa Langbang, Asst. Professor (NEAU) Khliehtyrshi, Jowai kam u symbod kongsan hei ya emlang ka Prof. S.M. Sungoh, Principal DDUCC kiwa da e yei yaroh wei kyrkhu kyrdoh ya kiwa wan chah sikai khnang wow man ki kiwa ye u yieñ skem hei wow seiñ ki yei khih i kreh yong ki da hi.
Ka Prof. S.M. Sungoh da e ko yei yaroh ya u Prof. P.S. Shukla, Vice Chancellor, NEHU uwa da e yarap ya ka DDUCC hei wow pynman kam kini ki sikai waphær waphær man-u-bnai yow ye ki khon khynroo khyllood u seiñ khih dei yong ki hi deiwa phah leh da kiwa sikai wa pliah katkam ka juk wa katni khnang yow ye ki wow kyrchaan rap bha chooh chooh pyn da ki ya ki hi, khnang wow kyntu yei yoh i kot ka Ri Jaiñtia waroh ka wi.
Da pynwai ya kani ka e sikai da ki kyntein khublei na u Wolnish Rymbai uwa man kam u College Programme Co-ordinator ka DDUCC, heijooh i por da saam leh ya ki Certificate cha waroh kiwa chimbynta.
Discussion about this post