Ka Society for Urban and Rural Empowerment (SURE) deiwa ya krehlang waka Nongtalang College da sdang ko yei sikai wow e yei sap kreh cha kiwa puræ Degree ha ki thaaiñ khappood wa em chajan kani ka College.
Kini ki e sikai u kynthup ki nadooh i chna baam, chna sabon, i rep tip, i psan ngap wei u leh yeini hapoh ka RUSA Equity Initiative Scheme wei da man ko i pyrchang wa da wanrah da u Dr. Ryan Reid Kharkongor, Principal ka Nongtalang College wei u man ko leh neibynta kiwa lai puræ kani ka College.
Ha ka yalang wai ya kani ka e sikai ha ka 9 tarik uni u bnai, neiliang u Dr. Kharkongor da khana u wa ka College deiwa ya krehlang waka Prime Meghalaya u sikai ko ya kiwa lai puræ yow man ki leh kam kiwa seiñ khih hanla man ka e sikai kawa tbian wei da kyrmen u ini daw yarap ko yow tip ki khynroo khyllood kawon ka jait kreh wa yatoh wa ki u sdang ki.
Neiliang u Dr. H.H. Mohrmen, Secretary ka SURE, da ong u wa kani ka NGO toh kawa da tipmit hapoh ka Meghalaya State Skill Development Society (MSSDS) kam kawi na kiwa e sikai wei da sñiawkmen u wow ya krehlang waka Nongtalang College.
Da khana u wa dadep leh wow e sikai ya kiwa boon ki jait kaam heiwa ar ngut na kiwa chah sikai da yoh ki ya ka Skill Icon Award wa e da ka MSSDS katwa kawi won na ka Prime Meghalaya wa da e da u Conrad K. Sangma, Montri Rangbah ynnin u snem.
Kamtæ da yooluti u wa kini kiwa daw chah sikai leh u chimkhia ki yow man ko ka laad ka luti wow yoh kreh ki.
Discussion about this post