Ka rel wa thymme wa tip kam ka Vande Metro da pynkylla pyrtuid ka cha ka ‘Namo Bharat Rapid Rail’ da ka Indian Railways kawa daw wai paidbah da u Prime Minister, Narendra Modi ha Gujarat myntu ka sngi kawa man leh chi sngi chwa ka sngikha u.
Kani ka Namo Bharat Rapid Rail toh kawa pynyabi ya ka Bhuj wa em ha Kutch District ka Gujarat waka Ahmedabad wei ka luti toh kawa jrong 360 Km kawa daw ye u pyndep hapoh 6 kynta.
Kani ka rel toh kawa ye u lai hadooh 110 Km/h wei daw sangeh ko ha Anjar, Gandhidham, Bhachau, Samakhiali, Halvad, Dhrangadhra, Viramgam, Chandlodiya, Sabarmati deiwa pynkut ha Kalupur wa em ha Ahmedabad.
Kani ka rel toh kawa daw krehkaam 6 sngi chi tayaaw lait noh ka sngi Saturday wei daw mih ko na Bhuj heipor 5:05 i step wei daw poi ko ha Ahmedabad heipor 10:50 i step wei daw mih biang ko na Ahmedabad heipor 5:30 i janmiet wei daw poi ko ha Bhuj heipor 11:20 i miet.
Kani ka rel toh kawa ye u kit 2,058 ngut ki bru deiwa kheiñlang wa kiwa yieñ katwa ki thaw chong da em neibynta ki 1,150 ngut.
I yaphær kani ka Vande Metro wa ki Vande Bharat Express toh wa lai ki du ha ki chnong wa em chajan wei man ki leh ya kitu kiwa yabeh kreh wei em ki leh boon kiwa dang thymme wym em ha ka Vande Bharat Express.
Discussion about this post