Ka Meghalaya Cricket Association daw pynman ko ya ka 1st Senior Women’s Interstate Friendship Tournament hapoh i pyrtuid ka North East Cricket Development Council kawa daw pynman ha Nongkhrah, Ri-Bhoi nadooh ka 30 tarik uni u bnai.
Kani u pynman kam ka T20 Tournament wei daw chimbynta ka jylla Arunachal Pradesh, Manipur, Meghalaya, Mizoram, Nagaland wa Sikkim. Neibynta ki chynrang won daw pynman da ka Nagaland Cricket Association kawa tip kam ka 2nd Senior Men’s Interstate Friendship Tournament, kawa da ka 50 Over chiliang.
Kani ka Men’s Tournament daw pynman nadooh ka 23 tarik hadooh ka 28 tarik uni u bnai ha ar tylli ki madan kitæ ka Nagaland Cricket Stadium wa Sovima Cricket Ground.
Ka Women’s Tournament won daw pynman ha ka madan wa thymme ka Meghalaya Cricket Association wa em ha Pahamsning, Nongkhrah, in Ri-Bhoi District nadooh kani ka 30 tarik wei daw pynkut ha ka 4 tarik u bnai wow wan.
Kini ki ar tylli ki Tournament toh kam wow pynkhreh ya jar jiar ki liang chwa wow sdang ka samoi yalehke ka BCCI neibynta u 2024-25 kiwa man leh kam ki Domestic Tournament.
Ha ka Men’s Tournament, ka Nagaland, Sikkim wa Mizoram da em ki ha ka Group A katwa ha ka Group B da em ka Meghalaya, Manipur wa Arunachal Pradesh.
Ha ka Women’s Tournament, ka Meghalaya, Arunachal Pradesh wa Manipur da em ki ha ka Group A, katwa ka Nagaland, Mizoram wa Sikkim da em ki ha Group B.
Discussion about this post