Ka ICDS Project Amlarem, West Jaiñtia Hills District chirup i ya krehlang ki chnat krehkaam sorkar waphær waphær wa kynthup nadooh ka chnat yong i chait i khiah, ka puræ puthi wa kiwi, ynne ka sngi da pynkut ko ya ka Poshan Maah næ i e sikai wa chi bnai lynter wa yatoh hajrong kammon u pynmyllien iwa bha tam wa yatoh wei chait i khiah cha ki paaid wa chong chnong ka Amlarem Block.
Ya kani ka Poshan Maah da sdang nadooh ka 1 tarik hadooh 30 tarik uni u Naikhynde, wei ya ka yalang pynkut da pynman ha Hall ka Syiem Jingsuk Amlarem wa da emlang u Dr. A. Saini, SDO Amlarem Civil Sub-Division kam u kongsan, ka R.Passah, Asst. Commissioner for Person with Disability ka chnat Social Welfare ka sorkar jylla kam ka symbood kongsan, neitæ u G.L.C. Mylliem, BDO ka Amlarem C&RD Block, ki waheh chnong, ki sahep sorkar na ki chnat krehkaam waphær waphær wa kiwi.
Ka Child Development Project Officer, ka H. Biam hawa klam yahkhmat da pynyoo haroh ko ya ki Project waphær waphær wa da pyndep ki hapoh uni u bnai kiwa yatoh wa i chait i khiah wa kynthup nadooh i sikai leh Yoga, i sikai wow baam, wow thung ki jait baam wa tei, neitæ u leh khooid wa kiwi kiwi.
Ka symbood kongsan da klam ko hajrong ka thong wa da wanrah ka sorkar neibynta u pynkupbor ya ki manbei da ki jait baam wa tei, neibhah sñiawthooh wa lym yoh ka manbei yei doh i pran wa chait wa khiah wei biang i baam, ym ye ko wow pyndep yei kaamram nadooh yung hadooh ha lait.
Neitæ da klam haroh ko hajrong i emkaam u yada yei kjut duna snaam (Anemia) neibhah wa booh ko hei maa yei im.
Heiyatoh wa i baam wa tei ong ko wym toh kiwa syat dor, wei kiwa sah pathan cha ki thaaiñ palatsor toh kiwa biang bha ya ki baam wa tei.
U kongsan da ong u wa nadooh ka sorkar bei waka sorkar jylla da ya krehlang ki chirup chirup yow pyntikna yei chait i khiah, i heh i kmai wa i biang ki jait baam wa tei ha ki khynnah.
Ong haroh u wa i ye u pynlait paidbah ya ka Menu yong ka ICDS ynne ka sngi daw man i myntoi neibhah da yoo yei ku i chait i khiah ha ki khynnah wa duna ya ki baam wa tei.
Yaroh u leh ya ki sahep ka chnat i chait i khiah, ki CDPO wa ki kynhun wa pait hapoh kani ka Block wa lyngba i chimkhia yong ki u pynman ki yalang waphær waphær da ye ki u tipmit ya ki khynnah, ki manbei wa duna ki baam wa tei khamtam ya ki manbei wa punkhon. Na itæ i daw ong u wa emkaam haroh i yakrehlang neibynta u pyndooh pyndam yei kjut Anemia wa maa ha ka thaaiñ.
Yooluti u wa dei ya krehlang ki chnat krehkaam wapher wapher ka sorkar, i thong i thrang i angnood u man iwa jop.
Kiwi won wa e i klam kynthup ya u G.L.C. Mylliem, u N. Lamare, waheh chnong ka Satpator wa u Dr. A. Khonglah, Block Medical Health Officer, Amlarem.
Ha kani ka sngi u kongsan da pynlait paidbah haroh u ya ka Menu yong ka ICDS, da saam khusnaam u leh cha kiwa jop hei yakob waphær waphær, wei da pynkup burom leh ya ki Village Organisation ka thaaiñ Amlarem kiwa da e i kyrchaan neibynta u jop i lai luti ka Poshan Maah, da pynkup burom haroh ya ki Aganwadi kiwa da kreh chitom neibynta wow pait bniah yei chait i khiah ki khonboo ki khynnah.
Discussion about this post