Ka 2 tarik u Naichiphaw kawa man ka sngi kha u Mahatma Gandhi, kamwa jooh leh khlieh u snem ha kani ka sngi, ki bor District ka West Jaiñtia, ka Jowai Municipal Board, ki bor pait ya ki yaaw ki haat waphær ha Jowai kamjooh ki dorbar chnong waphær ha uni u snem leh da pynman biang ki yei pynkhooid chnong pynkhooid yaaw deiwa mih yonglang wa da chimbynta nadooh ki khynnah, waheh, kynthai wa chynrang.
Ha ka yalang tbian wa pynman da ka yung krehkaam u Deputy Commissioner, West Jaiñtia Hills District deilang ka Jowai Municipal Board, ki Market Committee yong ka Seiñraij, Yaaw Chyiap, Yaaw CNI waka Dorbar Chnong Tympang Iawmusiang, heipor step chwa u sdang i pynkhooid, neiliang ka D.V. Lyngdoh, Additional Deputy Commissioner, West Jaiñtia kawa man leh kam ka CEO ka Jowai Municipal Board, da e ko yei klam yahkhmat heiyatoh wa kani ka sngi kamjooh leh hajrong i kordor yong i khooid i jngiar.
U President ka Seiñraij Jowai, u H. Toi hawa klam ong u, kani ka sngi pynkynmoo ko wow man kiwa lehkhooid ym du hei doh i pran tangwa ha ki soodong sookun khnang yow yoh yei chait i khiah.
Wei da ong u i man kyrpang kani ka sngi wym toh du wow kynmoo du kat yei lehkhooid tangwa ya kiwi tawon ki bynta wa u Mahatma Gandhi da hikai u lyngba i thoh i klam yong oo iwa man kam i e mynsien ya ki bru yow man kiwa im hok im khooid khlem pyntakha ya kiwi la dei ktien thylliej leh.
Neiliang u waheh chnong ka Tympang Iawmusiang, u Ajoy Lywait hawa klam kyntu u ya waroh kiwa chong yaaw u man kiwa lehkhooid neibhah i sma i tung u ktah nyngkong ko ya ki hi kiwa kamai ja-kpoh ha ki yaaw ki haat.
Neitæ kyntu haroh u ya ki paidbah wym toh u wan li noh ki cha Iawmusiang yei jhep wa mih napoh ki yung ki sem yong ki.
Ha kani ka sngi najrong wa sakhi yei pynkhooid yonglang ki paidbah ha Iawthymme, Yaaw CNI, Yaaw Chyiap, Yaaw Seiñraij wa kiwi, da sakhi leh yei chimbynta ki paidbah u pynkhooid ya ki luti syngkieñ, ki soodong sookun i yung i sem heiwa em ki chnong kiwa dei ya pynbait mih yonglang ki, em won ki chnong wa pna mih hi ki bru yow pynkhooid ya ki chyngkiar yung kamjooh ki sarok, ki luti syngkieñ.
Discussion about this post