Ka Meghalaya Youth League 2024 dapoi ko chei wakut ynne deiwa rah yei naam Champion ka West Jaiñtia District Sports Association ha ka U-14 katwa ka Shillong Sports Association won da jop ko ha ka U-16 heiwa ya ki yakhun Final da pynman ha SSA Stadium, First Ground, Polo ha Shillong.
Ka West Jaiñtia DSA da pynrem ko ya ka Nongstoin District Sports Association da 2-0 katwa ka Shillong SA da jop ko ya ka Ri-Bhoi District Sports Association da 2-1.
Ya kani ka Tournament da pynman da ka Meghalaya Football Association deiwa kyrchaan ka sorkar Meghalaya.
Ha ka yalehke U-14, ka kylla step da kut ko khlem da em wa thap kool tangwa ha ka kylla miet, u Shanmiki Myrchiang da thap nyngkong u wei da pynbood sa u Elvinson Lyngdoh yow pynyoh yei jop.
Ha ka U-16, ka Shillong da yoh ko wow thap chi kool chwa u kut ka kylla step lyngba ka Penalty wa chim da u Menangpyndap Khongjee.
Ka RBDSA da ye ko wow su kylliang lyngba u Wanplielad Marbaniang tangwa u Iminstar Mawlong da pyntam biang u ya ka Shillong kawa da neh hadooh wa kut ka yalehke.
Waroh ki ar liang wa jop Final da yoh ki mar Rs. 2 lak katwa kiwa rem won da yoh ki mar Rs. 1 lak.
Ha ka U-14, yei naam Player of the Final da yoh u Shanmiki Myrchiang na ka WJDSA uwa da yoh leh yei naam Player of the Tournament katwa u Kaisarmi Dkhar na ka WJDSA hi da yoh u yei naam Top Scorer. U Edyson Marbaniang na ka Shillong SA da yoh u yei naam Best Goalkeeper.
Ha ka U-16, yei naam Player of the Final da yoh u Iminstar Mawlong, u Iaiapkyrmen Kharkongor da yoh u yei naam Best Goalkeeper katwa u Menangpyndap Khongjee da yoh u yei naam Player of the Tournament kiwa waroh na ka Shillong SA. Yei naam Top Scorer da yoh u Me-u-ba-ai Sumer na Ri-Bhoi.
Discussion about this post