Ka Hynniewtrep Youth Council (HYC) da pynsñiaw ko yei sñiawkhia yei ye u psiah ki nong Bangladesh na Assam cha ka jylla Meghalaya, hadien wa ka Supreme Court ka ri India da pynksan ko ya ka kyndon 6A yong ka Citizenship Act, 1955, kawa da wanrah kam chibynta yong ka Assam Accord.
Hajrong kani ka yurim, ka CEC yong ka HYC da rai kow wo dawa na ka sorkar wow lai tynruh biang yei dawa pynkrehkaam ya ka Inner Line Permit (ILP) na ka sorkar pyrdi.
U President ka HYC, u Roykupar Synrem da ong u wa katkam ka hukum yong ka Supreme Court, ya ki bru wa lai psiah hadien u snem 1971 ha Assam, toh u kem ki wei wow phah liwan won cha ki thaw wa wan ki.
Da ong u wa ka Assam Accord daw krehkaam du hapoh Assam, katwa ha Meghalaya won ym em ki aiñ wow yada na kiwa psiah pyrchah aiñ kam ka ILP næ ka NRC, ki bru wa psiah pyrchah aiñ hapoh Assam hadien u snem 1971 da sñiawthooh ki wym em thaw de ha Assam wei chwa wow chah phah liwan biang cha ka thaw wa wan ki, iwa tieñ toh wa kini ki bru daw pyrchang ki wow psiah cha kani ka jylla.
Uwa yahkhmat ka HYC da ong u wa ka sorkar toh u chim ko yei kitkhlieh wow chimkhia u pynbor ya ka sorkar India wow pynkrehkaam ya ka ILP hapoh Meghalaya. Kawi de ka mat wa ka HYC da dawa ko toh wow em ka National Register of Citizens (NRC) deiwa booh ya u snem ah pyrtuid nadooh u snem 1971.
Hawa yatoh won wa ka Meghalaya Residents Safety and Security Act (MRSSA), da ong u wa ka seiñ da dawa ko wow pynkrehkaam ya ka MRSSA, 2020 neibhah ka MRSSA 2016 ym ye ko wow yada.
Puræ leh: Rai ka SC wa ka Section 6A ka Citizenship Act man ko katkam ka riti synchaar ka ri
Discussion about this post