Ka Thadlaskein Sports Association (TSA) da yoh biang ko yei tipmit hadien wa da chah Suspend ko nadooh u snem 2019 ha ka Meghalaya Football Association (MFA) neidaw wa tyngkheiñ ko ya Constitution wa iwa da phah wow leh ko da ka MFA.
Deiwa chimkhia kiwa chong chnong da thung da ka Adhoc Body hapoh i yakhhmat u Chairman wa u Convenor deiwa kyrchaan ki 31 tylli ki Club kiwa da tipmit ka TSA.
Kani ka Adhoc ka TSA da thoh ko cha ka MFA kawa man ka khlieh dooh wa pait yei yalehbol hapoh ka jylla yow kyrpaad wow pyndam noh ya ini wa chah Suspend deiwa wan ki wow pait ya ka yalang ka General Body Meeting yow jied ya kiwa kitkaam wa thymme heiwa neiliang ka MFA da smat ko wow pdiang yeini wa da kyrpaad.
Kamtæ ya kani ka General Body Meeting da pynman ha ka 19 tarik uni u bnai ha Wahiajer Community Hall deiwa emlang ki bru ka MFA wei da pynlai yei jied ya kiwa kitkaam hapoh i pait u General Secretary ka MFA, u Sunesh Syiem.
Neiliang ka MFA da pynsñiaw ko yei kmen wa da yoh biang u pynim ya ka Thadlaskein Sports Association hadien wa boon snem neibhah kani ka thaaiñ toh kawa da pynmih ya kiwa boon kiwa pawnaam kiwa da yoh wow mihkhmat ya ka jylla kamjooh ka ri.
Kiwa kitkaam ka TSA man ki kamni:
President- U Kmenlang Shylla
Vice-President – U Ebris Pariat wa u Mutchwa Thabah
General Secretary- U Ebormi Lyngdoh
Assistant General Secretary- Herperty Khyriem
Treasurer- U Pyrkhatbha Lamare
Da jied leh ya ki Secretary kiwa boon ki Committee deilang ki Executive Member.
Ka MFA da pyntip ko wa kani ka Executive Committee yong ka katni kawa dang chi snem da ye ko wow wanrah yow tipmit biang sa kawi ka Association, kattæ toh ka Ri-War Mihngi Football Association ka wym em de kreh kaam da slem bha.
Discussion about this post