I tyrrah kari ha i bynta u sarokbah hajan ka Jowai Civil Hospital, Ialong dang joor i kat dang mih ki sngi heiwa da em boon kiwa da mynsoo kamjooh i dooh ya ki mynsien wa kordor.
Ynne ka sngi neiliang ka Meghalaya People’s United Front (MPUF) hapoh i yahkhmat u Publicity Secretary ka seiñ, u Hamwer Bhoi wa u Finance Secretary, u Mainlip Lathong da yachem ki ya ka ADC ka West Jaiñtia Hills hajrong ini i kaam neidaw wa chim chuti u DC.
Neiliang u Hamwer Bhoi da ong u wa katkam wa man katni da chem wa em ka thaw pynyieñ Taxi wa Tourist Stand ha pynarliang u sarokbah ha Civil Hospital wa em ha Ialong iwa da pynkhynnia ya u sarok.
Kamtæ da ong u wa da kyrpaad ya ki bor District wow kyrriah noh ya kini ki Stand khnang wow lait iwon iwon i jia wa sñiawsih neini chaphrang.
Ha kani ka sngi da e leh ya ka dorkhat cha ka ADC kamjooh cha u SP ka District hajrong ini.
Heijooh i por ka seiñ da kyntu ko ya ki seiñ ki kari kamai Taxi wa Tourist wow krehlang wa ka seiñ yow lait na iwon iwon i jia tyrrah kari neini chaphrang khnang wow ye u yada ya ki mynsien ki bru wa lai wa wan na uni u sarok.
Discussion about this post