U Working President ka Congress, u Pynshngaiñ N Syiem da ong u wa hei yoo yong oo, ki paidbah kyruiñ khmat ki cha ka Congress hi, wei ka seiñ da chim ko ya kani ka laad wow pynyoh ya ki kyrtong kiwa biang.
Da ong u wa ka Congress em ko ya kiwa kyrchaan wa kiwa kreh ha man ki Unit, wei ym em i eh wow sai kyrtong, tangwa ym em jhan won ko wow e Ticket ya kiwon kiwon ki kyrtong, wei pynrap u wa kam kiwa yahkhmat daw pait ki yei long i man wow pyntikna u yoh ya ki kyrtong kiwa em kyrmen wow jop.
Hawa kylli da ong u wa i mih noh ki le ngut ki MLA ini wa dep daw ktah ko ya ka Party, tangwa ymtoh won hadooh wa ki paidbah daw kyntait ki ya ka Congress, wei da ong chooh chooh u wa hanla em i mih noh ki kattu katni, tangwa kiwa boon ki paidbah dang chaniah wei sñiawsuk ki ya ka Congress hi.
Hawa yatoh wa ki le tylli ki Constituency wa hap wow pynkhlan biang ka seiñ, da ong u wa ya kitu ki Constituency emkaam wow pait bha wei wow ap yeiwa ong kiwa yahkhmat wa kiwa boon wa lang khnang wow yoh ya ki kyrtong wa mon da ki paidbah.
Discussion about this post