Ka MP warim yong ka Tura Parliamentary Constituency, ka Agatha Sangma da ong ko wym toh iwa bakla ya u Montri Rangbah, u Conrad K Sangma wa ki Montri yong ka sorkar wow lai yalap Election ha Gambegre, neibhah heipor Election barabor hap wow lai paan Vote na ki paidbah.
Ini i klam ka Agatha toh hajrong i chah kynthah ha u MP wa katni uwa man uwa yahkhmat ka seiñ Congress, u Saleng Sangma uwa da ong wa u Montri Rangbah ryngkat ki Montri sorkar da lai psiah ki ha kawi pa kawi ka tyngkong yung, ha kawi pa kawi ka dong ka kyntoit ka Gambegre.
Hawa yaklam wa kiwa thoh khubor ha Shillong, ka Agatha kawa man ka diah u Conrad, da ong ko wa ha ka Election ini i rukom klam u Saleng toh ka wym sñiaw yahaap neibhah ki bru kiwa em ha ka Politics daw hap ki wow lai paan Vote na ki paidbah.
“I hap i wow kreh chitom wow yalap deiwa khlan ha ka Election, ym em iyi iyi wow bakla ya u Montri Rangbah wa kiwi ki Montri wow lai pynlut por wow yalap neibynta ka kyrtong yong ka seiñ”, da ong ka Agatha.
Da ong ko wa ini i lai hi da u Montri Rangbah wa ki Montri wow yalap Election da pynyoo ko yei chimkhia wot lada toh du kawi ka Election wa khian yow pyntikna yei jop wei wow pynyoo leh wa u Montri Rangbah em u wa ki paidbah ka Gambegre.
“Iyi wa i da yoh yei chah sikai na ki Election ha ki por wa dadep, toh wym toh u kheiñstiñ wot ya kawi ka Election leh”, da ong ka Agatha.
Heijooh i por ka Agatha da ong ko wa ka NPP da yoh ko yei chaniah na ki paidbah ha Gambegre, wei ki paidbah leh da yoo ki yei kaam u Montri Rangbah wa ya ki kaam wa ka sorkar da leh ko.
“Nga sñiaw O wa ki paidbah ka Gambegre kwah ki wow yoh ya ka MLA kawa em hapoh ka sorkar, ka wow yarap pynyoh ya ki kaam pynroi wa ki Scheme kiwa boon”, da ong chooh chooh ko.
Discussion about this post