Ka Hospital 50 thaw thiah wa tip kam ka 50 Bedded Sub-Divisional Hospital wa da mang u chna ha ka chnong Jaraiñ wa haap hapoh ka Amlarem Civil Sub-Division, West Jaiñtia Hills District, hei lut wa Rs. 11 klur ha i thaw wa heh kamwa 7500 sq ft, da hiar li pait ka ynne ka sngi da u MLA ka thaaiñ u Lahkmen Rymbui chirup i emlang ki sahep ka chnat i chait i khiah, ki bor pynlai chnong, ki bru waheh ka thaaiñ wa kiwi.
Kani ka Hospital ym du wa e chakri ko ya ki chnong wa marjan tangwa ya ki paidbah ka thaaiñ Amlarem hi waroh kawi.
U Lahkmen Rymbui hawa klam ong u, i wanrah ya kam kani ka Hospital toh iwa da thrang da angnood da slem bha da ki paidbah ka thaaiñ Amlarem, wei daw man leh i kyrkhu ya ki paidbah.
Khana u wa i pynkhreh neibynta ka 1st Phase ym slem de da sdang neibhah wa dadep e kti yei kreh cha u Contractor.
Najrong ka Hospital daw chna leh 13 tylli ki Quarter wow sah ki Doctor kamjooh kiwa kreh wei da booh por u pyndep hapoh 24 bnai.
Hajrong i ye u wanrah ya kani ka Hospital neiliang u Lahkmen Rymbui da pynsñiaw u i sñiawngooh wei e khublei ya u Montri Rangbah ka sorkar jylla, u Conrad K. Sangma, u Montri warim ka chnat i chait i khiah, u James PK Sangma kamjooh ya ka Dr. Ampareen Lyngdoh, Montri ka chnat i chait i khiah wa katni wa da yoobiang ko u pynku kyrdan ya ka Jaraiñ PHC cha ka 50 Bedded Sub-Divisional Hospital.
Discussion about this post