Wa thung ka BJP da ki bru yong hi tæ mih i kynrum kynram ha NEHU: Ronnie

U MLA ka Congress uwa man u Chief Whip ka Liang Pyrchah hapoh ka Yung Dorbar Chna Aiñ, u Ronnie V Lyngdoh da pynbaad u wa i mih i kynrum kynram hapoh ka skurbah North Eastern Hill University (NEHU) da sdang nadooh wa yoh synchaar ka BJP ha ka sorkar pyrdi.

Hawa klam hajrong i kynrum kynram wa da mih katni hapoh NEHU, u Ronnie da ong u wa ka NEHU toh ka skurbah kawa pynlai wei pait da ka sorkar pyrdi wei ka BJP kawa yahkhmat ka sorkar ha Delhi, da wanrah ko da u Vice Chancellor u wym tip iyi iyi wow pynlai ya ka skurbah.

“Nga da tip O wa ki bru ki bym biang wym tip iyi iyi da chah thung kaam du neidaw wa ki toh na ka seiñ RSS wa BJP. Nadooh wa da wan ka BJP ha i bor da mih kam kini ki kynrum kynram katwa nachwa ym pu em iyi iyi”, da ong u.

Da ong u wa ka BJP daw yaleh ko katwa ye yow ksoh ya kiwon kiwon ki thaw puræ wow pynlai chakhmat da i thmu yong ka.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Da ong u wa kiwa lai puræ da leh ki yeiwa toh tam wow yieñ pyrchah ya kani phang.

“Nga e O i yaroh ya ki khynroo wa lai puræ ka NEHU kiwa da yakhih. E laad wa katai ka skurbah u man ko ka thaw puræ, ka thaw thooh bniah, ymtoh ka thaw wa pynyaar yei rukom pyrkhat ki seiñ saiñpyrthai”, da ong u Ronnie.

Da ong u leh, “Pyrchang hi ko mo wow pynku yei nang i stat ha NEHU næ lyngba ka skurbah da pyrchang wow pynyaar yei rukom pyrkhat yong ki, iwa man i maa wa khroo”.

U Ronnie da khana u leh wa da kyntu ya u MP ka Congress na Tura, u Saleng A Sangma wow chimkhia ya ini i kaam wa ka chnat wa toh u pait wot chaduh u Montri Rangbahdooh ka ri, yow pynbait noh ya waroh i eh wa da mih khnang wa ki khynroo u ye ki wow uiñ biang chei puræ puthi.