Ka Mih-Myntdu Community Social Welfare Association Skill Training Center kawa em ha Salaroh, Jowai ha ka 18 tarik uni u bnai da saam ko ya ki Certificate cha kiwa da pyndep yei chah sikai yong ki ha ki jait kaam (Trade) waphær waphær kam ka Home Health Aide (HHA), General Duty Assistant (GDA) wa ka Assistant Fashion Designer.
Ha kani ka sngi, u Skill Development Officer ka West Jaiñtia Hills, u Lambormi Suchen hawa e yei klam da e khublei u ya waroh ki khynnah kiwa da ye u pyndep yei chah sikai yong ki, wei da ong u leh wa ini i yoh ya ki Certificate ham e u man i iwa kut, deiwa ong wa ka Certificate hi man ko kam i sdang ya iwon iwon i kaam iwa da dep chah sikai. Neibhah wa ha jar jiar ki sap wa dep pynpliah i emkaam u pynkrehkaam i ki khang yow ye i u yieñ ha ki kjat yong i hi.
Da ong chooh chooh u leh wa haka pyrthai dooh kaam, da toh i por u pynemkaam i da ki sap ki phong wa e kyrpang u Blai ya i.
Da ong u leh wa sa iwi leh kamwa yoo u katni wa hapoh ka jylla yong i duna bha ki kaam, kamtæ da pynchlur u ya ki khynnah wa dadep pynpliah wow lai ki cha baar ka jylla yow rap yoh chooh chooh ki u pynyaar yei stat i tip wa yoh ki napoh ka jylla.
Da pynkut u deiwa ong wa ka Meghalaya State Skills Development Society (MSSDS) chirup wa ka Mih-Myntdu Community Social Welfare Association (MCSWA) da yaleh dohyap ki u thooh ki laad ki luti kammon u pynyoh khih yoh kreh ya kiwa dadep chah sikai yow ye ki wow yieñ hei kjat yong ki hi.
Ka Principal yong ka Dr. Norman Tunnel School of Nursing hawa e yei klam da e khublei ko ya ka MCSWA kawa da wanrah ya kam kani ka jait sikai neibynta i chait i khiah wei ong ko wa ini i sdang kam ini i da wai dwar ko ya chiboon ki khon khynroo yong i ki wym em khih em khan yow ye ki wow yieñ hei kjat yong ki hi khang wa ka mynried yong ki u man ko kawa tyrchaaiñ.
Da khana haroh ko wa da sakhi ko wa heipor wa wan sikai pynpliah ki hapoh ka Training Center ka Norman Tunnel School of Nursing da yoo sakhiat yei kreh chitom ki khynnah.
Kamtæ da e khublei wei kyrkhu kyrdoh ko ya waroh kiwa da pyndep yei chah sikai yow yoh ki ka mynried kawa tyrchaaiñ.
Ha kani ka sngi da emlang leh u Aris J Nongkynrih, Chief Functionary ka MCSWA wei da pynlai ya ka yalang da ka Sunita Suna wei da yoh ya ki kyntien khublei na ka Thywill Dkhar.
Waroh kiwa da pyndep da em ki 90 ngut kiwa mar 30 ngut ha ka GDA, HHA wa Assistant Fashion Designer.
Discussion about this post