Ka Estimates Committee yong ka Meghalaya Legislative Assembly wa yahkhmat da u Chairman uwa man leh u MLA ka Nongpoh, u Mayralborn Syiem, ynne da lai sylli ko ya ki kreh hapoh ka Shillong Smart City Project.
Ha ini i lai sylli da emlang u Adelbert Nongrum (North Shillong MLA), u Remington Gabil Momin (Rambrai-Jyrngam MLA), u Wailadmiki Shylla (Jowai MLA) wa ka Miani D Shira (Ampati MLA) chirup wa ki sahep ka Meghalaya Assembly Secretariat, ka Urban Affairs Department wa PWD (Roads).
Ka Committee da booddien ko yei chna pynmiat ya ka yaaw Laitumkhrah wa da chna ha i lut wa Rs 28.84 klur, wei da lai pait leh ya ki Smart Roads ha ki bynta ka sor Shillong kiwa da thmu wow pynduna yei khynnia.
Da lai leh cha ka Office cum Automated Multi-Level Car Parking Facility ha Mawkhar wow pynbiang ya ki thaw pynyieñ kari ha Shillong, kamjooh ka Commercial Complex ha Polo kawa Rs. 100.33 klur ka wow yarap ha i khayi pateiñ ka sor.
Ha Police Bazar, da lai pait ya ka Shillong Business-cum-Tourism and Cultural Centre kawa Rs. 211 klur kawa da chna yow pynku ya ki kaam uiñke suwari wei da pynkut yei lai pait lai sylli deiwa lai cha ki thaw pynlang umslap kiwa da chna ha kiwa boon ki bynta ka sor.
U Mayralborn Syiem da pynsñiaw u yei sñiawkmen yei lai bait ki kreh deiwa sñiawthooh leh ya kiwa boon ki moochynthut wa da maad da kiwa pynkreh ya kini ki kaam nadooh wow kyrriah ya kiwa chongdai wa kiwi de tangwa da ong u wa kini waroh toh yow myntoi ki paidbah ka Shillong.
Da sñiawkmen u leh yei lai bait ki kreh ha Polo, Laitumkhrah wa Motphran ki wow pynkyllooid ya ki sarok ha Shillong.
Da pyntip u leh wa daw phah ya ka Report wa bniah ya waroh iwa da chem ki deiwa yooluti wa kini waroh ki kreh daw ye u pyndep heipor wa biang.
Discussion about this post