Ka Khun Hynñiewtrep National Awakening Movement (KHNAM) da pynkhreh ko wow sai kyrtong du ha Khasi Hills Autonomous District Council (KHADC) neibynta ka Election MDC kawa daw man noh ha u Thohlakhmi 2025, katwa ha Jaiñtia Hills Autonomous District Council (JHADC) ym pynyakhun ko.
U Working President ka KHNAM, u Thomas Passah da ong u wa ka seiñ da pynkhreh bha ko wow yakhun ya ka Election cha KHADC, wei hadooh kattæ da jan dap 20 tylli ki Constituency kiwa ki kyrtong da mih ki chakhmat wow paan Ticket.
Da khana u wa ka seiñ daw chong yalang ka Central Executive Committee (CEC) yow pynbna ya ki kyrtong ha ka thup kawa nyngkong.
“I daw sai kyrtong i du ha ka Election KHADC, cha JHADC ym chimbynta wot lada da yoh i 2-3 ngut kiwa kwah wow yakhun neidaw wym pu biang bha ki. I emkaam i wow pynlai ymut ya ka KHADC”, da ong u Thomas Passah.
Kam wow kdaw heini wa ka KHNAM kawa da seiñ nadooh u snem 2002, ym em sai kyrtong ko ha ka Election MLA ha u snem 2023, wei da man ko kawi na ki seiñ ri-loom ha ka saiñpyrthai kawa ki paidbah ym de klam ware ki heipor Election.
Hawa kylli, u Thomas Passah da pdiang u wa ka KHNAM ha ka Election ym em ware ko hakhmat, tangwa da ong wa i kaamram yong ka seiñ toh wow kreh wei ki paidbah sakhi ki wa ka KHNAM kam ka seiñ kawa mih man-i-por, ym du ha ka Election.
“I wan ka Election katni daw pyrchang i wow pynkhreh, hao ym ye wow pynchongchit neibhah wa ka seiñ ym em ko ya ka poisa, wei i pyrchang i wow pynkhlan ya ka seiñ da ka yurim”, da ong u.
Da ong chooh chooh u wa iyi wa ka KHNAM da ye ko wow leh toh wow thooh kyrtong kiwa em yei thmu kawa che wei kiwa em i angnood kawa bha wow krehlang wei kiwa em kawi ka thong.
“Ha ki Constituency kiwa i da em chwa ki kyrtong i da phah wow lai ki chakhmat”, da pyntikna u.
Da ong u leh wa ka KHNAM toh ka seiñ wym wiar neibhah man ko neibynta ki paidbah.
“Yow pynkhlan ya ka seiñ ha ka Election toh ha ki paidbah wow jied, wei hei bor yong i toh u kreh wei chakri, lada ki paidbah jied ki daw yoh ya ki MDC”, da ong u Thomas Passah.
Discussion about this post