Ham e laad yei dooh u khanglaad ko yeiwa thmu

Ka e sikai wa san sngi heiyatoh wow pynpliah yei rukom ah sñiooh næ “Hairdressing & Grooming” neibynta ki chynrang wa pynman da ka Deen Dayal Upadhyay Community College (DDUCC) for Skill Development, Wahiajer kawi naka chnat yong ka North-Eastern Hill University (NEHU) dapoi ko cha wakut haka 29 tarik uni u bnai.

Ha kani ka sngi pynkut da em ka yalang tbian neibynta u saam Certificate cha waroh kiwa da pyndep yei chah sikai, wei wow e ki kyntien sneiñ kyntu kamjooh ki kyntien e mynsien ya kini ki khynroo wa kammon u lai luti ki neini chakhmat khnang yow man khoo ini wa da yoh sikai ki.

Haka yalang wa pynlai da u Program Coordinator ka DDUCC, u Wolnish Rymbai da yoh i klam kyntu klam e mynsien na ka Prof. S.M. Sungoh, Principal In-Charge, DDUCC, na u Andriew Sari, Secretary chnong Wahiajer wa na u Dr. P. Nongtdu, Principal, Jaintia Eastern College uwa man kam u kongsan ha kani ka sngi.

Ka Prof. S.M. Sungoh ong ko kattu neini chakhmat du lyngba i kreh chitom, i thooh bniah wow pynpliah chooh chooh yei sap najrong wa man kiwa yaichah daw ye u yoh kamai bha na kani ka kaam.

Related posts

Phah ka Dr. Ampareen ya ki kyntien sñiawlem cha ka manyung wa jia ha MCH Hospital

June 5, 2025

Ngait u payu ka Sonam wa dang im hi ko deiwa kyntu wym toh wow thooh yei metyap ko

June 5, 2025

U Dr. P. Nongtdu kyntu u wow man kiwa raikut u sdang yieñ hei kjat yong idæ neibhah i yimphoo heiyatoh wa kani ka sap da man kaam sakhiat ko, wei hadien wa wai dukan toh u man leh kiwa ye u pynyatoh wa ki bru wa wan mih cha ka dukan najrong wow man kiwa lehkhooid wei wow e leh i chakri wa pynkmen pynhun tam ya ki yow ye u ku neipor cheipor.

Chooh chooh ong u kawon kawon ka kaam du kawa ye hi u pynim wei chong hei bien u chimkhia u kreh chitom, heiwa da e nongmuna ya ki bru baar jylla wa hap wan na ki chnong wa jngai u khih haka jylla yong i leh dang im ki, katwon tam i hi ki tre chnong wa em ki yung ki sem.

Lada chem saja won haka poisa poilaiñ wow sdang khih leh da e yumut u wow lai mih cha ka chnat Industry wa kiwi kiwi ki laad ki luti wa da wailaad ka sorkar, deiwa ong ham e laad wa i dooh i duk u khanglaad ko ya iwon iwon wa mut wa thmu.

Neiliang u Andriew Sari hawa wan emlang ha kani ka sngi, ong u wa hei yoo i chem yong oo i poi kani ka Community College kawa man ka chnat yong ka NEHU ha chnong Wahiajer, da man i myntoi wa khroo ya ki khon khynroo khyllood wym du ya ki tre chnong tangwa na kylleiñ da wan ki wow pyndep yei chah sikai pynpliah ha ki sap waphær waphær, wei napyrdi kiwa dadep pynpliah leh da boon kiwa da sdang yieñ hei yong ki hi ki kjat.