Ka Khooid Ya Ka Wah Myntdu (KYWM) hei lai luti yong ka wow kyrsu ya ki tre chnong wow yada pynneh pynsah ya ka Wah Myntdu neibynta wow im u chngaaiñ ki bru ka chnong Jowai wa ki warep wa em talawiar yong ka, hei bor iwa khian da yaleh ko chiboon ki kaam kiwa e myntoi yei miat i bha yong kiwa boon walang khamtam kiwa chkeh umbaam umdih, umrep umriang nadooh Pynthorneiñ hadooh Pynthorwah.
Neiliang u Khroo Lamsalanki Pariat, President KYWM hawa yoo wa sakhi ha kini ki sngi yei chah tympiah tympra ka thwai ka Beipun Riangkit Nikhla, ka wah Mynkrem ka chakri ka chnat ka Myntdu, kawa man kawi na ki bor wa yada ya ka raij ka muluk, dap u dei sñiawsih wa khia pyrkhat wei niawliar niawtang, neibhah najrong wa em ki aiñ sorkar wa khoom wa kdoh yei man laitlooid laitlan ki bru pyrthai, i kaap hukum, kaap adong bru adong Blai, ki bru chim kabu pteiñ ki hawa chit wa che wow leh ki kaam wa man pyrchah yei man kyrpang kyntang ka Myntdu wa ka Mynkrem.
Chooh chooh da ong u leh ha chilynter ka Myntdu em chiboon ki thwai em naam em parom kamjooh ha ka Mynkrem won man i thaw wa kyrpang kyntang yong ka Beipun Riangkit ka bru kawa da kup yeitæ i Maian Blai heiwa ki khon ki ksu ka Kur Soo Kpoh Khad-Ar Wyrnai kamjooh ki khon ka chnong Jowai wa ki chnong wa yabi kiwa hadooh kini ki sngi kiwa tip ya ka nia ka yutang, kheiñkor kheiñburom kheiñkyntang bha ki ya ka Mynkrem wa ki thwai ki langen wa kynthup ya ka Sati Myntdu, Lamynchi, Sangman wa ka Syntu Ksiar.
Hajrong ini i leh ki bor kiwa rhah wa khwan ki wym tip de u pyrkhat u burom yei hok longbru manbru wa yei man kyrpang kyntang ka Myntdu wa ka Mynkrem, booh u Khroo Pariat yow dak kylli hakhmat ka sorkar, ileh wa yaphær i rukom krehkaam ka PWD wa chna sarok ha East Khasi Hills ym chah ko ya kiwa kreh yow surok 4 Lane wow noh chi belcha i khyndaw namo khlem da pynsih pyntakha, pyntngit pynjngut yei man ka Umiew ha Um Tangar, katwa ha Ri-loom Jaiñtia won ka PWD chah ko u pynkreh yow surok Jowai Bypass deiwa noh khyndaw khloh moo tymbud i rood ka Myntdu deiwa pynjngut, pynsihdur i, pyndooh yei man ka wah Myntdu wa ka Mynkrem.
Hei pynkut neiliang ka Khooid Ya Ka Wah Myntdu lyngba u President, da ong u lada toh dei bor bru ym ye ym yoh bor yoh mynsien de wow yaleh pyrchah yeini iyi iyi iwa man wa jia ya ka Myntdu wa ka Mynkrem wa kiwi tawon ki thwai, da chaniah langien u sa du hei bor u Blai, ki Blai ki Syiem wow bichaar yeini i lehbor.
La dang toh wa i im ki bru u chngaaiñ, u biang u dap ki ha ka chnong Jowai wa kiwa em talawiar ka Myntdu. Kyntu u ya waroh ki tre chnong tawiar ka Myntdu khamtam kiwa ha Jowai wow yieñ yaleh klam yeini, saiñdur katni yow chngaaiñ i im ha ka mynstep ka mankawi.
Discussion about this post