Chongkun ka Dorbar ki Soo Langdoh ha madan Lariang, Ialong

Ka Dorbar ki Soo Langdoh ha madan Lariang, Ialong toh kawi na ki Dorbar yachemlang wa kyrpang yong ki Chakri Ñiam hapoh ki Soo Raij-Soo Langdoh kawa man katkam ka rukom dustur sikai ñiam hei yahkhmat u Dolloi kam u khlieh ka ñiam khlieh ka Elaka.

Ya kani ka Dorbar ki Soo Langdoh da pynman katkam ka dustur sikai niam hadien wa dadep ah ya u kba u khoo na pynthor na bhiang wei ha uni u snem da pynman ya ka ha ka sngi Pyngkat 15 tarik u Kmaichonglad heiwa najrong ki Chakri Ñiam yong ki Soo Raij-Soo Langdoh da sakhilang leh da ki yahkhmat yong ki Seiñraij wa kynthup yow O.H. Toi, President ka Seiñraij Jowai, u Pyrkhat Shylla, President ka Seiñraij Ialong, u Ker Lakiang, General Secretary ka Seiñraij Chyrmang wa u H. Phawa, President ka Seiñraij Tuber deilang ki manbei manpa wa ki khynroo khyllood.

U Pator ka Raij Jowai, u Raymond Nartiang kam u chongknor yong kani ka dorbar da e u ki kyntien yahkhmat wa ki kyntien pdiang burom neitæ won pynbood i klam i khana ki Soo Langdoh ya ki sngi ki tayaaw yong ka Chaad Ñiam Behdieñkhlam 2025, heiwa ha Raij Chyrmang ka Chaad Ñiam Behdeiñkhlam u man ko ha ka sngi Mulong 1 tarik u Naisan, ha Raij Jowai ka sngi pynkut ya ka Chaad Ñiam Behdieñkhlam u man ko ha ka Muchai 14 tarik u Naiynñiaw, ha Raij Tuber ka sngi pynkut ya ka Chaad Ñiam Behdieñkhlam u man ko ha ka Muchai 22 tarik u Naiynñiaw katwa ha Raij Ialong won ka sngi pynkut ya ka Chaad Ñiam behdieñkhlam u man ko ha ka sngi Muchai 7 tarik Naisaphra 2025. 

U Dolloi ka Elaka Jowai, u Puramon Kynjing kam u khlieh ka niam khlieh ka Elaka dap u dei sñiawngooh sñiawburom wa khroo ya ki Soo Langdoh kiwa da kreh chitom hei wow pyndep ya ki kaam ñiam da jar jiar ki Raij ki chnong neibynta wow toh u biang ka chnong ka Raij ha waroh ki liang heijooh i por khut kyrsu kyntu u ya ki kur wa embhah embynta ha ki kaam ñiam yong raij wow pynmih ki ya ki Kni, ka kchu ka siang ki wow kit u bah ya ka lyngkor yong i chakri ñiam hapoh ki Raij ki chnong khnang yow im u neh u sah ka ñiam ka rukom, ka dustur riti teiñ la pateiñ.

Related posts

Da rah tarik ya ka General Meeting ka Kur Sana kawa daw pynman ha Jowai

May 7, 2025

Ym chah ya kiwa wan dai baam ha ka Chaad Sukra ka Seiñraij Chnong Tuber Kmaichnong

May 3, 2025

Iwa kyrpang chooh ha kani ka Dorbar da em leh i suit i choor wei ngoohblai ngoohsyiem ki Soo Langdoh chirup wow Dolloi, ki wasan waheh wei dayoh leh i klam i kappæ hajrong ki phang waphær heiwa u Myown Chyrmang, Kñi ka Raij Jowai da klam u chaphang “I Lam Dong”, u Jadeja Dkhar, Maji ka Raij Tuber da klam u hajrong ka phang wa ong “I kitkhia ya ki kaam ñiam, yow suk u saiñ ka Raij ka Chnong”, u Pyrkhat Shylla, President Seinraij Tuber da klam u ya ka phang wa ong “I kreh bha ki nongkrehniam ku ka niam ka rukom” katwa u Ker Lakiang, General Secretary, Seinraij Chyrmang da klam u ha ka phang wa ong “I dor wa ka nongrim ka yutang kñia pyrthat”.

Khaddooh chwa wow poi cha wakut yong kani ka Dorbar, u Dolloi kam u khlieh ka niam khlieh ka Elaka da pynsñiaw u leh hakhmat ka Dorbar ya ka dustur riti jied Langdoh, Pynkyntang Langdoh heiwa da ka sur u waboon walang da rai wa ki Soo Langdoh-Soo Raij waroh toh u yaklam yaphyllu yumut sani bha yeini i kaam ha jar jiar ki chnong ki raij khnang wa iwon iwon i thoh i wow phah cha ka JHADC neibynta wow pynpsiah hapoh ka Customary Law u man iwa biang yow lait ka pateiñ hadien nei wiarnar wiar luti.