Ka Dorbar Chnong Khimusniang, Jowai kawa da sdang yei lehkmen dap 75 snem ka chnong namo ka Platinum Jubilee nadooh u bnai Duyatra 2024, haka 28 tarik won uni u bnai da pynhaap pyrda noh ko ya kani ka lehkmen haka yalang wa da pynman ha pchem ka Indoor Sports Hall ka chnong.
Ha kani ka sngi pynhaap pyrda, u Dr. W.R. Kharlukhi MP Rajya Sabha da man u kam u kongsan, u MLA ka Jowai, u Wailadmiki Shylla kam u symbood kongsan hei emlang u MDC ka thaaiñ u Saron Paswet, u Nominated MDC, u Octomewot Lamin, u Dolloi ka Elaka Jowai, u Puramon Kynjing, ki waheh chnong na ki dorbar chnong waphær waphær ka Jowai, kiwa chah khut sñiawbha, najrong ki paaid wa chong chnong ka Khimusniang.
U Wailadmiki Shylla hawa e yei klam da yaroh u yei ku i roi ka chnong Khimusniang wa kamjooh i yatylli wa em haka, wa wot oo kam u MLA leh kular u wow yakrehlang chirup ha iwon iwon i bynta.
Da ong u leh wa kam u MLA iwon iwon wa da klam paidbah u heipor wa paan kyrchaan na ki, boon iwa da pyndep lut u, wei em kiwa dang lai chakhmat i kreh, deiwa pynkynmoo u kam yaka Umngot Water Supply Scheme, ka MCH Hospital kiwa da ye u pynkrehkaam, neitæ ka Iawmusiang Complex won i kreh dang lai i chakhmat najrong kiwi de.
Heiyatoh wa ki mat dawa ka chnong Khimusniang leh ong u, wym em u mylliñ u khamtam heiyatoh wa u sarok Synod Road deiwa pynbna wa ha u snem 2025 u chna pyndep noh ya oo.
Katwa neibynta u sarok wow lai cha PHE Oorkhla won ong u kat wym ye ka PHE u e kti cha ka PWD, neiliang yong oo da yaklam u wa u Executive Engineer ka PHE u pynkhreh yaka Estimate wa kamjooh leh da yaklam u wa u Minister, u Commissioner Secretary wa Chief Engineer ka PHE yow pynsmat Sanction khnang yow suk ki paidbah wa lai wa wan kamjooh kiwa chong wa sah cha kani ka thaw.
Hajrong kini kiyi kiyi waroh khut kyntu u i yakrehlang yong waroh khnang yow ku chooh chooh i roi i paar ha kani ka chnong.
Neiliang u kongsan, u Dr. W.R. Kharlukhi hawa klam da kynmoo tamdien u yei kyrchaan wa yoh u naki bru ka chnong Jowai heipor wa man u kam u President ka seiñ JSU, wa em kawi ka yakhih wa joor heiwa da kem ya oo deiwa thmu u rah ya oo hapoh ka kyndon Meghalaya Preventive Detention Ordinance, tangwa nei mih ki paidbah ka chnong Jowai wow tia cha thanat da hap pynlait noh ya oo.
Na itæ i daw ong u kam ka dak wow burom ya ki paidbah ka Ri-loom Jaiñtia kiwa jooh kyrchaan ya oo da rai u wa chwa u kut ka samoi yong oo kam u MP katwa ye na ki Scheme yong oo u e u cha Ri-loom Jaiñtia khamtam ha chnong Jowai.
Heijooh i por leh kam ka dak wa burom u ya u MLA wa katni uwi wa da kyrchan ya oo yow man u kam u MP Rajya Sabha, kular u wa haka Financial Year 2025-2026, Rs. 10 lak u e ya ka chnong Khimusniang neibynta ka Community Hall.
Neitæ pynkut u yei klam deiwa ong wa u Blai uwa chakri lang i toh uwa sakhiat kamtæ yooluti u wow emlang u chirup waka chnong Khimusniang ha iwon iwon i bynta.
Ha kani ka sngi najrong wa pynlait paidbah yaka Souvenir yong ka chnong da u Dr. W.R. Kharlukhi, da yoh leh i chaad i rwai, kamjooh i pynkup burom cha kiwa ha-yung ha-sem kitu wa da khlaad noh wa embynta u seiñ u sdang yaka chnong Khimusniang, wa yaki bru samen kiwa chimkhia hei kaam chnong.
Neitæ da pynhiar leh yaka lama yong ka chnong da u MLA.
Discussion about this post