Dang em kiwa boon wa kwah u psiah, kyntait u Sniawbhalang wa em i yoosih ya ka NPP

U National General Secretary ka National People’s Party (NPP), u Sniawbhalang Dhar da kyntait u wa em i yoosih pyrchah ya ka NPP iwa ye wow ktah ha ka Election MDC kawa daw man ha u Thohlakhmi (Feb) wow wan.

“Nga ym tharai O wa em i pyrchah ya ka NPP, wei lada em leh daw hap i wow kreh chitom ha ka Election”, da ong Sniawhbhalang hawa klam ynne ka sngi.

Da ong u wa hadien ka Election, ka NPP daw chna ko ya ka Executive Committtee ha waroh ar tylli ki District Council.

U Sniawbhlang da ong u yeini hawa kylli hajrong i mih noh u MDC ka Mawlai Constituency, u Teiborlang Pathaw na ka NPP wow yakhun ya ka Election kam u kyrtong samen.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hawa kylli lada daw em chooh kiwa ye wow mih na ka NPP kamwa da leh da u MDC ka Mawlai, u Sniawbhalang da ong u, “Ymboi kylli na nga yeitæ, chong ha ki”.

U Sniawbhalang uwa man leh kam u Symbood Montri Rangbah ka jylla, da kam u wa em boon ki bru kiwa kwah wow yakhun ya ka Election MDC na ka NPP.

“I por dang em wei daw pait i, neibhah em boon kiwa kwah wow yakhun ya ka Election na ka NPP. Ha ka Election da jooh man kamni wa em kiwa mih wei em kiwa psiah thymme”, da ong u hawa kylli wa ka seiñ kammon pyrkhat ko lada dang em kiwa thmu wow mih na ka NPP.

Hawa kylli chooh chooh, da ong u wa ka Voice of the People Party (VPP) ymtoh kawa maa ya ka NPP ha ka Election.

Katkam wa ong u Sniawbhalang, kawi ka Constituency yaphær ko na kawi won, kamtæ ym em i maa ya ka NPP lada na ka VPP næ na kiwi won ki seiñ saiñpyrthai kiwa yakhun pyrchah ha ka Election.