Na Iawmusiang u sdang ka JNC wow lai pynsñiawthooh chaphang ka Save Jaiñtia Mission

Ka Jaiñtia National Council (JNC) ha ka kyrwoh na u Publicity Secretary, u Mebanteilang Sukhlaiñ kam chibynta wow sdang noh i lai luti yong ka Save Jaiñtia Mission kawa ka seiñ dang dep pynbna paidbah ko ha ka 14 tarik u Kmaichonglad (Dec), 2024 kawa em ya ki 5 tylli ki mat dawa hapoh kani ka Mission kitæ toh wow pynkhlan ya ka JHADC, wow pynpsiah yei ktieñ Jaiñtia ha ka State Language Act ka jylla (deilang leh ha i sur rwai State Anthem), wow dawa chna noh ya ka Policy thymme heiyatoh wa i thungkreh thungkaam ha ki karkhana pynmih khyndaw-bilat, wow pynbait noh ya u pood u ang hapyrdi ka Jaiñtia Hills waka Assam deiwa pynchong yurim na ka Map ka Jaiñtia Hills kawa nachwa u snem 1951, wei kawa khaddooh wow dawa chna noh ya ka Small Scale Coal Mining Policy.

Hapoh kani ka Mission leh ka seiñ da chna ko ya kawi ka chnat krehkaam ka wow tip pyrtuid kam ka Employment Commission ka wow pait u sylli yei rukom thungkaam thungjaam ki karkhana pynmih khyndaw-bilat kiwa em ha kylleiñ soodong ka Ri-loom Jaiñtia khnang wa i rukom thungkreh ym man i kiwa theh chiliang wei kani ka Commission leh daw lai hiar ko wow kynreh ya ki kot ki sla næ ki Labour License yong ki bru khamtam kiwa na baar kiwa kreh pyrchah aiñ.

Related posts

Pynkhooid yaaw kiwa chongdai ha Jowai hei yahkhmat ka chnat Food Safety

August 21, 2025

Yap u khynnah nei chah riñ bordin heipor wa chlai um

August 21, 2025

Ya kani ka Save Jaiñtia Mission ka JNC daw sdang noh ko yei lai luti wow pynche cha kiwa chong chnong deiwa pynman ya ka yalang paidbah ha Iawmusiang, Jowai ha kani ka 15 tarik u January 2025, wei daw pynche leh yei thmu yong ka seiñ heiyatoh wa i daw wa chna ya kani ka Mission.

Ka seiñ da kani ka kyrwoh phah ko leh cha phi ki khon ki hajar ka Bri u Ynñiawtrep Yñniawasa wow e i kyrchaan wa pura yong phi chirup ya kani ka Mission deiwa ya emlang phi wa ka seiñ ha katai ka 15 tarik, kamtæ da khut da wer ya phi waroh nadooh ki manbei manpa, ki waheh wasian, kiwa yahkhmat seiñbhalang, kiwa yahkhmat chnong, ki khynroo khyllood wow sñiawbha phi u pynlait yei por wa kordor yong phi wow ya emlang phi waka seiñ neibhah i emlang wa i chimbynta i yong phi daw e bor e mynsien ko wow chakri hok ya ka ri waka jaitbru hi waroh kawi.