Ynne ka sngi, u Commissioner & Secretary ka Sports and Youth Affairs Department, u Dr. Vijay Kumar da wan sylli u yei pynkhreh neibynta ka Meghalaya Games 2025 ka wow man ha kylleiñ ka West Jaiñtia Hills.
Neiliang u Dr. Vijay chirup wa ki heh ka MSOA deilang ki sahep ki chnat sorkar da lai pait chwa ki yei pynkhreh ha Wahiajer Multi Sports Complex, bood won cha i thaw baam ha madan Kiang Nangbah Government College, kamjooh i thaw sah ki khynnah ha Jowai Polytechnic neitæ won ya ka Kiang Nangbah Stadium.
Hadien ini hawa yaklam wa kiwa pathai khubor da yaroh u yei pynkhreh neibynta kani ka lympung iwa da chimpor kamwa 6 bnai kattu.
Da ong u wa deiwa wan kani ka lympung, ka sor Jowai da yoh ko yei dur wa thymme heiwa da kdaw u ya ki yung wa da niaam rong thymme, ki thaw yalehke wa da pynmiat, wa kiwi kiwi wei ini daw pynkhyrngiat i ya ki khynnah wa lai chuti neibhah manda wan biang ki cha Jowai daw yoo ki yeiwa kylla.
Chooh chooh da yaroh u ya ka Kiang Nangbah Indoor Stadium ka wow pynman ya ka Badminton heiwa da yoh ko ya ka Maple Flooring kawa wot ha Shillong leh ympu em ki.
Da pyntip u wa i wai paidbah yei sdang namo ka Grand Opening u man ko ha ka 21 tarik uni u bnai wei daw man ko kawa heh bha ya ki paidbah ka Jowai wa ka Ri-loom Jaiñtia.
Ha kani ka tamasa daw em palat 4,000 ngut ki wow chimbynta wei man iwa miat bha neibhah ki bru na kylleiñ u wanlang ki ha iwi donhi i thaw.
U Dr. Vijay da pyntip u leh wa ka Swimming Pool ha Jowai man iwa chimpor wei daw pteiñ won i kreh ya ka wei neibynta kani ka Games u man ko ha Crinoline, Shillong.
Hawa kylli won heiyatoh wa ki kreh ki chna wa sahteiñ kiwa dawa bha kam ha Wahiajer, ka bordiñ, ki thaw chongke ha talawiar ka Kiang Nangbah Stadium wa kiwi kiwi, u Vijay da ong u wa i kreh daw man iwa pteiñ ha kini ki thaw wot hadien kani ka lympung.
Discussion about this post