U Symbood Montri Rangbah ka jylla, u Prestone Tynsong da khana u wa ki bru yong yong ki Sikh wa em ha Delhi da pynsñiaw ki wa kwah ki wow kyrriah ya ki bru na Them Metor, Them Ïewmawlong cha ka thaw ki chipai kawa em ha kylla ka Them Metor.
Kam wow pynkynmoo wa chwa ini ka sorkar da pynkhreh ko yei pynwandur (Blueprint) yow kyrriah ya kiwa sah ha Them Ïewmawlong cha ka thaw wa em ka yung krehkaam ka Shillong Municipal Board wa katni, tangwa ini i pynkhreh yong ka sorkar da sahteiñ noh i wei da mih won i klam waka chnat yada ri ka ri India yow kyrpaad wow e dei thaw ki chipai wa em ha Lum Survey.
Hawa klam wa kiwa thoh khubor ha ka sngi Thohdieñ, u Prestone da khana u wa ki bru wa mihkhmat ya ki Sikh da lai yaklam hi ki ha Delhi hajrong ini i kwah yong ki deiwa yachem leh ya u Montri yada ri, u Rajnath Singh yow kyrpaad na oo wow e dei thaw ki chipai.
Da khana u wa hadien wa ka sorkar da yoh ko yeini i tyrwa, da thoh ko cha ka Ministry wow kyrpaad wa lada man katwa ye toh wow pdiang yeini wa da tyrwa.
U Prestone da ong u wa lada yoh yei thaw ki chipai toh iwa bha bha, we daw lait leh nei e dei thaw yong ka sorkar, tangwa lada ym yoh yei thaw ki chipai, i tyrwa wa da pynkhreh ka sorkar u krehkaam hi i neibhah wym emlaad da kamwi.
Discussion about this post