Lehkmen ka chnong Jowai ya ka 76th Republic Day

Ka 76th Republic Day da lehkmen ya ka ynne ha madan Jrisaleiñ, Chutwakhu, Jowai heiwa u Montri sorkar, u Comingone Ymbon da wan u wow pynhær yaka lama ka ri wei da chim u leh ya ka Rashtriya Salute neibynta ki 15 tylli ki dhab wa chimbynta ha ka March Past wa kynthup ya ki District Police Jowai, ka Government Girls Higher Secondary School, NCC, ka Meghalaya Bharat Scout and Guides wa 12 tylli ki skur wei da emlang leh ki kari sorkar kiwa da pynriam (Tableau) da ki chnat sorkar kiwa da pynyoo ya ki Scheme wa da pynkrehkaam ki wei ki kaam wa da ye ki wow leh. 

Ya ka March Past da jop da ka JNV Mukhla School, hei wa ar da yoh ka Seinraij Higher Secondary School, Jowai katwa hei wa le da yoh ka St. Mary Mazzerello Higher Secondary School, Jowai. 

Neibynta ki Tableau da jop ka yung krehkaam u District Horticulture Officer, Jowai, hei wa ar da yoh ka yung krehkaam u District AH & Veterinary Officer katwa hei wa le da yoh ka yung krehkaam u District Commerce & Industries Centre. 

Ha kani ka sngi da pynkup burom leh ya kiwa rwai wa tem wa kiwa chna yei sur deilang i Music Video ka 6th Meghalaya Games. 

Da yoh leh yei rwai, i chaad, i saam baam cha ki khynnah ka Children’s Home da ki heh sorkar wa ki seiñ wa boon. 

Ha Amlarem Civil Sub Division da wan wow pynhær yaka lama da u Gavin Mylliem, MLA ka Sohra haka yalang wa pynman ha madan ka Amlarem Government Lower Primary School. 

Da em leh i pynkup burom ya ar ngut kiwa sikai skur, ka Amvalina Buam na Muktapur Government LP School wa u Tiliyous Lamare na Tarangblang Government School yei kreh chitom ki wow e yei stat i tip cha ki khynnah.

Da pynkup burom leh ya u Dawanmi Challam, Assistant Agriculture Inspector, Amlarem ya ki kaam wa bha u.

Ka Dawki Village Water Committee da yoh ko leh ya ka khusnaam kam kawa ye u pyntikna wa yoh yaka um wa khooid wa suba cha waroh ki manyung wei da pynup burom leh ya ki ASHA.