18 ngut ki bru kiwa mut wow lai cha ka Maha Khumbh Mela da dooh ki yei mynsien ynnin i miet ka 15 tarik ha New Delhi Railway Station hadien wa hær ka khubor hamsaya wa da chah pyndam ki Train wa mut wow lai cha Prayagraj, Uttar Pradesh wa pynman ya kani ka mela.
Kiwa yap kynthup ki ya 9 ngut ki kynthai, 4 ngut ki chynrang wa 5 ngut ki khynnah heiwa 15 ngut toh kiwa da khlaad pyn ha ini i thaw wa jia hi katwa 3 ngut won da khlaad ki hapoh Hospital.
Neiliang ka chnat Railways da ong ko wa ini da jia i neidaw wa joor wa khynnia wei boon ki bru tangwa ki paidbah da ong ki wym em wa pait wa yoo yow pynbait yei lai i wan ki bru kiwa mut wow lai cha ka Khumbh Mela.
Kiwa boon ki bru da yang ki ha ka Platform wa 12 wa 13 yow ku ya ka Swatantrata Senani Express wa ka Bhubaneswar-Rajdhani Express tangwa da poor ka khubor hamsaya wa da chah pyndam noh kini ki Train wei heini i por dapoi kawi ka Special Train yow lai cha Kumbh kawa tip kam ka Prayagraj Express kawa dapoi ha Platform 14.
Ha ini i por ki spah ngut ki paidbah da phet ki wow lai cha ka Platform 14 yow ku da kani ka Prayagraj Express heiwa ha ini i por da chah yooh ki bru wei ki RPF (Railway Protection Force) ym ye de ki wow leh iyi iyi.
Chooh chooh da mih leh ki pynbaad wa da em i pynbna paidbah ha ka Railway Station iwa chibet deiwi chibet deiwi.
Da em leh da jan dap 1500 ngut kiwa da thied ya ki Unreserved Ticket yow ku da ka Prayagraj Express iwa da pynmih sa iwi i yukylli wa ileh sang da dai hadooh katni tylli ki General Ticket.
Discussion about this post