U Lakhon Dkhar, u kyrtong MDC ka NPP na ka 4-Amwi Khliehtyrshi Constituency hawa e yei klam haka yalang yalap Election wa da pynman ha chnong Shkenpyrsit hei miet ka 18 tarik, da pynsñiaw u i sñiawskem wow poi biang haka thong neibhah wa em u i chaniah wa skem haka Party wa yieñ u, kamjooh leh ki paidbah na ki 6 tylli ki chnong warim wa jooh kyrchan ya oo wa dang skem ki.
Kamtæ kyrpaad u ya ki 6 tylli ki chnong thymme wa em cha kani ka thaaiñ leh wow e ki i kyrchaan wa pura ya oo, deiwa kular leh wa na kini ki chnong thymme kawon kawon ka chnong wa e kyrchaan boon dooh ya oo daw leh u iwa rap kyrpang ya ki lyngba ka District Council manda poi u haka thong.
Kam u MDC warim ong u hadien wa ki paidbah da pynjop ki ya oo ha u 2019, da thooh u ki laad ki kabu neibynta u wanrah ki laad yarap wa emkaam ya ki chnong ki thaw hapoh ka Constituency, wei lyngba i chem u wa kiwa yahkhmat ka Party NPP toh kiwa em i kitkhlieh neibynta i roi i paar haki chnong ki thaw ka imlang sahlang kamtæ da yakrehlang u wa kani ka Party hadooh ynne ka sngi.
Ong u leh hei lai luti kam u MDC ym em randien u han hapyrdi i eh i khor wa boon, kamjooh leh i eh i khoo lyngba i wan ka khlam COVID-19, iwa da wanrah yei dooh nong wa khroo ya warohlang la yaka sorkar ki paidbah ka imlang sahlang haki dur ki rukom waphær waphær yong ka District ka jylla waka ri waroh kawi.
Heiwa kam u MDC da pyrchang u hei bor wa khian u pynyoh ki Scheme pynroi cha waroh ki chnong wa da pynman ya oo kam u MDC.
Ha kani ka sngi chim u leh ka laad ka kabu wow sñiawngooh ya ki 6 tylli ki chnong thymme hapoh ka Constituency yong oo wa da man ki chnong wa jooh pynjop em burom leh 10 snem ya u Pa yong oo u (L) Sahneh Rymbai wow man u kam u chakri wa khian ha kini ki chong ki thaaiñ.
Discussion about this post