Ka Raij Jowai lyngba ka Dorbar Niam hei yahkhmat u Dolloi kam u khlieh ka niam, ynne ka sngi kam chibynta i pynkhreh pynkhrum, pynphooh pynphieñ ya ka Yung Langdoh chwa wow sdang ki lehniam waphær heiyatoh wa ka Behdieñkhlam, da pyndep yei Syrdep Phlang hei chimbyntalang ki chakri niam ka Raij wei sakhilang leh da ki waheh wasian ka Seiñraij Jowai.
Ha kani ka sngi chwa wow sdang ka Syrdep Phlang, u Dolloi, u Puramon Kynjin chirup u Pator, u Langdoh, ki Sangot, ki Wasan, ki Phra Kur–Phra Kmai kiwa embhah embynta ha ki kaam niam yong Raij da siang da booh ki i ngooh i dem i pynap Blai pynap Syiem.
U Dolloi hei yaklam da khana u kani ka Syrdep Phlang yei Yung Langdoh man ko ka rukom, dustur wa da pynjooh sikai na warim chisnem pood neibhah ha kani ka yung ya kiwa boon ki kaam niam yong ka Raij ka chnong da pyndep ki kiwa man katkam ki hukum adong u Trekirot.
Chooh chooh da ong u leh lyngba kani ka Syrdep Phlang man ko ka luti wow wanrah ya itæ i sñiaw iwa em i jooh i kitkhlieh hapyrdi ki khon ka Raij neibynta i miat i bha wei phooh i phieñ yong kani ka Yung Langdoh, i wan ya chimbynta kiwa boon walang ha kani ka syrdep yung phlang wei man ko leh ka dak i sñiawngooh sñiawburom ka pateiñ ya ka Beipun Doh kawa man kawa kha ya ka pateiñ ka wow pyndep ya ki kaam niam yonglang yongbi neibynta wow yoh ka chnong ka raij yei khyrkhu khyrdoh, i bit i biang ha waroh ki liang.
Da khana u leh wa ha kani ka Yung Langdoh, u Dolloi pyndep u yei kaam bichaar, khadar neibynta i chongsuk chongsaaiñ wei man miat manbha ki khon ka raij ka chnong, ha kani ka yung Langdoh da em leh u Moosmai heiwa lada em i yaklam eh, klam khor, ym yabait yasood yong i pyrkhat pyrdaiñ kam ki bru, hakhmat ka Duwan u Moosmai u em ka yasmai yatang ka wow pynyoo ka sakhi yeitæ i manhok hakhmat ki Blai ki Syiem.
Iwa khaddooh ong u i pyndep niam ha kani ka Yung Langdoh ym mut ko du neibynta ki khon ka niamtre, kyrpang i kyrkhu man i ya warohlang ki khon ka raij ka chnong.
Discussion about this post