Kam chibynta ka lehkmen ya ka International Women’s Day, ka yung krehkaam ka District Hub for Empowerment of Women, Social Welfare Department, West Jaiñtia Hills District deiwa ya krehlang wa ka Jowai Police Department, da pynman ki da ka Bike Rally wow e Wyrta yow pynkupbor, u yatylli, u em i bor i mynsien wow lai chakhmat.
Ya kani ka Bike Rally da kaweh lama da ka C. Lyngdoh, Additional Superintendent of Police, Jowai deiwa sdang na pchem ka District Library Compound, Mynthong, Jowai, deiwa pynkut ha Madan Wahriong, Mihmyntdu heiwa da chimbynta 70 tylli ki thuk-thuk wa yah da ki chynrang wa kynthai kiwa da lai luti lyngba ka chnong Jowai deiwa tem lang yei sur Khasi wa pyrtuid “Kynthei Tur Shaphrang”.
Hawa kaweh ya ka lama, neiliang ka C. Lyngdoh da ong ko wa ka International Women’s Day toh yow lehkmen yei bor, i mynsien wa ki moomær wa dapoi ki kynthai ha kylleiñ ka pyrthai. Da ong ko leh wa hawa pait yeiwa da ye ki kynthai u leh hap leh wow kynmoo yei eh i khoo wa hap ki u maad hawa im ki man-ka-sngi.
Hawa klam yeiwa emkaam u pynkupbor ya ki kynthai, da ong ko wa i hok ki kynthai man ki leh i hok manbru wei kam ki kynthai em ki yei bynta wa kordor bha hapoh ka yung ka sem kam ka kurim ka bei wa ka khon, da man ki leh kam u budloom i roi i paar ka imlang sahlang.
Da e nongmuna ko yei emlang kiwa boon ki kynthai wa yah thuk-thuk ha kani ka Bike Rally wa pynyoo ki kynthai ye ki wow leh ya iwon iwon.
Da kynchlur ko leh ya waroh wow pynkupbor ya ki kynthai wei wow kyrchaan ki yow ye ki u ku wei wow yahkhmat ha kiwa boon ki kaam.
Da yoh leh yei klam na ka S. Lakaing, BBBP Ambassador, District Hub for Empowerment of Women, u S. Shadap, O.C. Jowai Police Station, ka R. Ryngkhlem, President Iasnohktilang VO Mihmyntdu kiwa da ban joor yei emkaam wow pynkupbor ya ki kynthai wei wow pyndooh ya ki moochynthut wa khanglaad ya ki u ku ki.
Discussion about this post