Ka phlim Jaiñtia wa thymme wa e pyrtuid “Ka Nongmuna” wa pynmih da ka RJ Musical Wonders chirup i yakrehlang wa ka Neighbourhood Boyz Production da pynlait paidbah ya ka Trailer yong ka ha ka 15 tarik uni u bnai da u Jamshaphrang Pohtam, MDC ka War Central.
Ha ka yalang pynlait paidbah ya kani ka Trailer ha Yungwalieh ka Loompyrdi Ïongpiah wa pynlai da ka Dr. Wa-i-sa Sumer, da emlang nadooh kiwa chimbynta ha kani ka phlim kamjooh kiwa chah khut sñiawbha wei da yoh i ngooh Blai na u Sumarlang Paswet wa i pynsñiaw yei yumut ka phlim na u Juhhi Nonghuloo.
Kiwa klam wa kynthup nadooh ka Phelima Sumer, u Wansalan E Dhar, u Careme Phawa wa u Arwotki Sumer, President ka All Jaiñtia Film, Music & Arts Association, kam kiwa jooh embynta hei kam thoh phlim, ak film, pynmih phlim, ong ki kani ka kaam man ko kawa eh, neibhah ymtoh iwa suk wow pynwandur ya ka parom yong kawon kawon ka phim næ ka Drama wot hadooh wow ak pynyatoh katkam wa lai ka parom hadooh wow ktah leh yei sñiaw i bor pyrkhat ki bru wa pait.
U Jamshaphrang Pohtam hawa e yei klam da pynchlur u ya ki khon khynroo khyllood wym toh u pynsepai ki yei sap i phong wa da e kyrpang u Blai, ong u leh emkaam wow pynskem ya kam kani ka sap deiwa yoh i tipmit wa kyrpang neiliang ka sorkar jylla kamjooh ka District Council, ha chirup deilang i yahluti wa skem chooh chooh ka seiñ wa pait kyrpang yei bha i miat kiwa em sap hei ak, hei thoh wei pynmih phlim.
Yow pait bniah yei sap ki khynroo khyllood, ong u iwa emkam tam toh i pait bniah neiliang ka yung ka sem neibhah i pyndur wa khlan tam toh naka yung ka sem wa ha kawon ka luti u yah u pynyoo ya ki khon.
Neitæ pynsñiaw u leh i diaw wa ha kani ka juk boon ki khon khynroo khyllood ngop ki hei dih i baam wa sih tæ sepai noh ka sap wa e u Blai ya ki haki laiñ waphær waphær.
Kamtæ kyntu u ya ki seiñ pynmih phlim wow yaleh ki u wanrah haroh ka khubor heiyatoh wei maa wa mih lada ngop hei dih drugs kamjooh lada yoh yow khñiang kjut HIV.
Wei kam ki bei ki pa leh næ kiwa ha-yung ha-sem hawa kwah ya ki khon ki kti kiwa ha-yung ha-sem u lait ki na iwon iwon i sih, pyn da idæ toh u pynyoo ka nongmuna wa bha, neibhah kiwa dang khian pathan em ki ka khmat wa nep bha wow pait u sylli yeiwa leh ki waheh.
Heijooh i por yooluti u lyngba kani ka phlim “Ka Nongmuna” u man ko leh ka nongmuna wa bha ya ka imlang sahlang.
Hei yaklam wa u Director kani ka phlim, u Ericson Lamare khana u wa kani ka phlim em ko chimboon i sneiñ nadooh ki khynroo, ki manbei manpa neibhah da ya sariem ko wei long i man wa tyngkhooh hapoh ki yung ki sem.
Pyntip u leh wa wym slem de da pynlait hi ya ka phlim waroh kawi, kamtæ kyrpaad u ya ki paidbah wow sñiawbha ki u e i kyrchaan wa pura yong ki.
Discussion about this post