Kiwa kreh ki Bank waphær waphær ha ka ri wa kynthup hapoh ka jylla Meghalaya hapoh ka chatri yong ka Union Forum of Bank Unions (UFBU) da rai ki wow pynman yakhih deiwa sangeh krehkaam hadooh 48 kynta na ka 23 tarik hadooh 25 tarik uni u bnai.
Ini i rai yong ka UFBU toh yow pynsñiaw yei dawa yong ki kam kiwa kreh ha ki ‘Public Sector Bank’ kiwa em ha ka ri waroh kawi.
Neiliang kiwa yahkhmat ka Union Forum of Bank Unions, u Wanraplang Mawroh wa u Davies Lyngdoh da khana ki wa ka yakhih yong ki toh yow pynbor ya ka sorkar wow pynmankaam yeiwa dawa ki wa dadep ki wow booh nadooh wow pyndap ki kreh wa dang lait ha ki Bank ka sorkar wa kiwi de kiwa dang emkaam.
Da pyntip ki wa ki kreh wa khlem pyndap toh nadooh ki kyrdan sahep hadooh kiwi ki kyrdan wei kamwa man kattæ kiwa kreh hap kreh ki 6 sngi chi tyaaw wei da hap ki leh wow pait ya chiboon kiwi won ki kaam deiwa hap ki wow leh boon jait neidaw wa duna kiwa kreh.
Kamtæ ha kani ka yakhih u dawa wow kreh noh san sngi chi tayaaw iwa man katkam wa kreh hapoh ka Banking Industry.
Neiliang u Davies Lyngdoh da ong u wa lada nujor wa ki ‘Private Bank’ wa kiwa kreh ha ka ‘Public Sector Bank’ phær ko bak-la-bak nadooh u snem 2013 hadooh u snem 2024 heiwa ha ki Public Sector Bank kiwa kreh ha u snem 2013 da em ki 8,86,490 ngut, tangwa kat ha u snem 2024 da em ki du 7,46,679 ngut. Katwa ha ki Private Bank ha u snem 2013 da em ki 2,29,124 ngut katwa ha u snem 2024 da ku ki cha 8,46,530 ngut, iwa pynyoo wa i boon kiwa kreh da ku cha palat 200%, katwa ha ki Bank sorkar da hiar pathan ki.
Kiwi de ki dawa toh wow pyndam noh chisiendon yeiwa phah pynmih ini wa dep da ka sorkar hajrong ka DFS wa ya ka PLI iwa da pynkhuslai ya kiwa kreh, wow e i chngaaiñ ya kiwa kreh nei chah thombor ha ki paidbah, wow pyndap ya ki kaam Workmen/Officer Director ha PSB, i sahteiñ ka IBA, wow pynkylla ya ka Gratuity Act, wow pynneh 51% ka Equity Capital ha ka IDBI Bank ka sorkar, wow pynsangeh ya ka PSB, wow sangeh yei e wai ya ki kaam wa thung pura wei wow sangeh yei thung kreh dei wym khooid ha ki Bank.
Discussion about this post