E khublei u Wailadmiki ya ka sorkar wa da yoh biang u tih mooyong | Daw yaklam neibynta kiwa em thaw khian

U MLA ka Jowai uwa man leh u State President ka NPYF, u Wailadmiki Shylla ynne hawa yaklam wa kiwa pathai khubor da e khublei u ya ka sorkar jylla wa ya u Montri Rangbah ka jylla, u Conrad Sangma wa ynnin da ye biang wow wai ya i tih mooyong katkam ka juk wa katni namo ka Scientific Mining iwa da ye u leh ha Byndihati, East Jaiñtia Hills.

Da ong u wa ha u 2014 nei khang ka NGT wow tih mooyong da ktah bha i ya i yoh i laa kiwa chong chnong ka Ri-loom Jaiñtia kiwa chaniah nei kaam khayi mooyong wei nei kreh chitom ka sorkar MDA ha u 2019 da ye u kyrriah yei khang tih mooyong da ka Supreme Court.

Chooh chooh da ong u wa ka Supreme Court da chah ko wow tih mooyong toh du lyngba ka juk wa katni namo ka Scientific Mining wei nadooh itæ i por ka sorkar da yarap ko ya kiwa em thaw wei kiwa thmu wow tih mooyong wow pynbiang ki ya ki kot ki sla yong ki.

U Wailadmiki da e khublei u leh ya ka Ministry of Coal kawa da pdiang namo kawa da e License ya ki le tylli ki Mining Plan hapoh ka jylla deiwa ngait skem wa daw boon chooh neini ki wow yoh bor wow tih ya uni u mar pohkhyndaw.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Heiyatoh won wei ood kiwa tih mooyong kiwa khian hajrong ki kyndon wa ong wa emkaam wow yoh ya i thaw wa heh bha wow tih biang ya u Mooyong, u Wailadmiki da ong u wa waroh chi kattu da tih ymtoh katkam ka juk wa katni wei deiwa yoh ya ki le tylli ki License daw ye u tip kammon u leh neibynta kiwa tih mooyong kiwa khian.

Da ong u leh wa ka sorkar daw thooh ko ya ki laad wow yoh kiwa tih mooyong kiwa khian thaw wow yoh biang ki u tih ya uni u mar deiwa yaklam leh wa ka Coal Ministry khlem ktah ya ka mariang.