U MLA ka Bharatiya Janata Party (BJP) na Pynthorumkhrah uwa man leh u Montri hapoh ka sorkar MDA-II, u Alexander Laloo Hek, da ong u wa i kylliang ya ka chuki Montri hapyrdi yong oo wa u MLA ka BJP na South Shillong, u Sanbor Shullai, chong i hei rai yong kiwa yahkhmat ka seiñ.
“Ye phi wow kylli na u State President næ na ka BJP, ymtoh na nga. Nga ym ye oo wow khana iyi iyi leh wow ong iyi iyi ya phi hawa yatoh wa ini i kaam, toh i rai yong ka Party, iyi wa ka seiñ rai ko nga hap O wow kohngooh yeitæ”, da ong u Hek hawa kylli kiwa thoh khubor ha ka sngi wa ar.
Kam wow pynkynmoo wa ka BJP nadooh wa sdang u chna ya ka sorkar MDA-II, da phah ko dei thoh cha u National President yong ka National People’s Party (NPP) uwa man u Montri Rangbah ka jylla, u Conrad K. Sangma wow kylliang ya ka chuki Montri mar ar snem chiteiñ hapydri u Alexander Laloo Hek wa u Sanbor Shullai kiwa man ki ar ngut ki MLA yong ka BJP.
Ka BJP toh ka seiñ saiñpyrthei kawa da ya krehlang wa ka NPP ha Delhi wei ha kani ka jylla nadooh u snem 2018 wei kattæ leh da e yei kyrchaan ya ka NPP kawa yahkhmat ya ka sorkar Meghalaya Democratic Alliance (MDA-II).
Kiwa yahkhmat ka BJP ryngkat wa ar ngut ki MLA da mynjur ki wow e laad chwa ya u AL Hek wow man kam u Montri sorkar hapoh ka sorkar neibynta ar snem chiteiñ wei daw kut noh ha ka 7 tarik u Naisaphra uni u snem wei hadien itæ daw toh won sa ka pali yong u Sanbor wow man Montri neibynta ki snem kiwa dang sah, wei da phah leh ya waroh ar ngut ki MLA wow burom ki yei rai yong ka seiñ wei wow ya krehlang neibynta i myntoi wa i ya biang lang.
Kam wow pynkynmoo leh wa ha ka samoi krehkaam yong ka sorkar MDA-I ha u 2018-23, ki ar ngut ki MLA ka BJP da chong kylliang ki ya ka chuki Montri mar ar snem chiteiñ, tangwa ha itu i por ym em i ya kdoh ktien chwa. Ha u snem 2023 hadien wa chna ya ka sorkar MDA-II, da em chwa i ya pynbait wow saam mar ar snem chiteiñ ya ka chuki Montri hapydri kini ki MLA ka BJP.
Discussion about this post