Ynne ka sngi Hat, 19 tarik, ka Raij Jowai hei yahkhmat u Dolloi kam u khlieh ka niam khlieh ka Elaka chirup ki chakri niam ka Raij, ki Phra Kur Phra Kmai, ki waheh wasian wa ki khon khynroo ka Raij Jowai da pyndep ki ya ka lehniam Thoh Langdoh næ ka kñia e ngooh yow Blai Langdoh ha duwan pyndep niam wa em ha Khloo Langdoh.
Kam wa pynkynmoo, chwa wow poi kani ka sngi, ha ka Musiang, 15 tarik da em ka leh niam Kbai Mooknor kawa da man hei chimbyntalang ki chakri niam ka Raij deilang ki Phra Kur Phra Kmai chirup wa ki waheh wasian ka Raij da mih ki chakhmat ka Yaaw ka Syiem wow pyndep ya ka lehniam Kbai Mooknor nae i e wyrta chula hakhmat ka Yaaw ka Syiem wa da toh i por wow sdang noh ka Niam Behdieñkhlam hapoh ka chnong ka Raij.
Katkam ka rukom dustur wa pynjooh sikai ha kani ka sngi Thoh Langdoh næ Kñia Thoh Langdoh, ka adong niam ong ko wym hoi u pooh u daiñ, u pyntakha tamong, u tympiah tympra næ u pyntngit pynjngut yei doh i pran ka Bei Rymaw neibhah kani toh ka sngi wow pynkhroo yei burom ka Bei Rymaw kawa psa wa pusai wa khat wa kyndup yow bru pyrthai liang wanang.
Hakhmat ka Duwan Kñia wa em u Moo Langdoh, ya ka lehniam ha kani ka step da pyndep da u Sangot Paswet chirup i synranlang u Sangot Pasubon wa u Sangot Pakyntein.
Neiliang u Dolloi, u Puramon Kynjing hei yaklam, da ong u wa na kani ka leh niam kam ki pateiñ u 7 Wasa kiwa im ha kani ka juk, yoh i chiboon i sikai heiyatoh wei longbru manbru wei wow im ha ka yurim wow tip u maya, u burom, u sñiawngooh yei kyrkhu wa yoh na ka bei rymaw.
Ha kani ka step hadien wa da pyndep ya ka leh niam na Kloo Langdoh ka bynta wa bood won yong ka niam wa hap ki Wasan u pyndep toh ha Yung Langdoh ya ka Thung Sang heiwa ki Wasan u chim ki yow symbe toh symbe saru, symbe sakhia dep tæ bet ki ha kpær i rasa wa em ha chrooh ka Yung Langdoh wei deiwa pyndep ya kani ka niam, ki khon ka Raij ka chnong ha ka sngi wa bood dahoi u sdang ki yei pooh i loor, i bet i thung yong ki.
Discussion about this post