Wai u Madonbai ya ka School Carnival ka AHSS | Kyntu u wow syndong nei kjut HIV/AIDS

U Madonbai Rymbai, MDC ka Amwi Khliehtyrshi ynne ka sngi da wai pyrda u ya ka “School Carnival 2025” yong ka Adventist Higher Secondary School, Khliehtyrshi kawa da pynman hajrong ka phang “Break the Chain, Break the Stigma”, chirup i ya krehlang waka Meghalaya Aids Control Society.

Kani ka School Carnival u pynman ya ka ha ki ar sngi deiwa wan chimbyntalang ki skur waphær waphær ha ki jait lehke pynwyrngai nadooh ki chaad tynre, i yakob rwai, i yakob Extempore Speech, yakob chna Poster, yakob chaad, yakob lehke Drama wa kiwi kiwi.

Kamtæ ha ka yalang wai pyrda yong ynne ka sngi sdang, da yoh leh i klam pynsñiawthooh hajrong u khñiang kjut HIV na u kongsan kamjooh u symbood kongsan hei emlang kiwa sikai wa ki khynnah skur.

U Project Director ka Meghalaya AIDS Control Society, u Dr. W.B. Langstieh, MD Pathologist kam u symbood kongsan ong u i daw wa wanrah ya kani ka mat u yaklam ha ki skur ki College toh wa ha kini ki rta ki khynnah em ki i maa wow yoh ya uni u khñiang kjut.

Related posts

Sñiawngooh ka JSM wa da yoh ya ka Exam Centre ka MPSC ha Jowai

April 4, 2025

I pyntip cha kitu ki wym pu em yoh ya ka Scholarship

April 4, 2025

Neibhah ki kynthai hei rta wa 12 snem chaneiñ, ki chynrang won 15 snem da sdang ki u phær i heh i san hei doh i pran kamjooh hei man kynthai chynrang, wei jooh poi u pood wow ngop ki hei chongkha khynnah, iwa ye u poi leh chei punkhon.

Neitæ mih won i eh i khoo wa boonjait wa ye u man neidaw wa dooh, wym em khih em kreh wa kiwi ki daw tæ poi chei yakhlaad, poi chei piah pra ka yung ka sem.

Hadien neitæ won mih biang ki daw, ki eh wa boonjait, tæ poi sei chongkha na uwi u bru cha uwi tawon tæ yoh yei kjut STI wa kynthup ka HIV.

Neitæ ye u man na ki daw waphær waphær, ki khon ki kti poi kylla khynnah sarok ki, tæ ye won u man leh manda maad ki yei eh wa boonjait boon kiwa kylla man khynnah dai met, næ poi cha u pood wow ngop hei dih drugs wa joor i khia pyrkhat iwa wanrah chei yoh khñiang kjut HIV.

Neiliang u Madonbai Rymbai hawa klam kam u kongsan sñiawngooh u ya ki bor pynlai kani ka skur wa e laad ki ya oo u embynta ha kani ka yalang neibhah sñiawthooh u wa man ko kawa emkaam tam hei im yong ki bru, kamjooh wa da man ko ka kjut kawa maa tam ha pyrthai wa emkaam u yakhun bha ya ka.

Kamtæ ong u bha wow yada chwa bar u thooh ki laad sumaar hadien wa yoh, wei toh u syndong bha leh neibhah wa nang joor ko kat nang mih ki sngi.

Wei yooluti u leh lyngba kani ka School Carnival u yasaam kylliang yei kitkhlieh wow yakhun ya uni khñiang kjut neibynta i bha i miat yonglang ha ka imlang sahlang, wei wow pyntikna leh wa kiwa yoh ya ini i kjut u yoh ki ka laad wow sumaar, wym wow yoobeiñ ya ki.