Da: U Leiky Sayoo, General Secretary Seiñ Kyntu Seiñ Raij 12 Daloi
Ka Seiñ Kyntu Seiñ Raij 12-Daloi ka dei ka seng kaba don hapoh ka Ri Jaiñtia ba la ithuh lyngba ka sorkar Meghalaya ha kaba ka jingthmu jong ka ka long ban kyntiew bad ban pynkhlaiñ ia la ka Dustur ka Riti ryngkat ka rukom ngeit ia la ka Niam ka Rukom (Indigenous Faith) kum u khun Hynniew Trep Hynniew Skum. Ngi kum ka seng ngi pynpaw ia ka jingsngew dom bad ka jingsngew bitar haduh kata kata haba ioh sngew ia ki kyntien lyngba ki Panelists ne ki nong ia shim bynta kiba la ia shim bynta ha ka program ba ki khot ka “RYNSAN IATHIR” kaba la long ha ka 25 tarik u bnai Lber 2025 ba la pyngsnew lyngba ka 4front Media.
Nyngkong eh ngi sngew kmen shi katde eh haba ngi ioh i ia ka jing iatai ne iathir ka jong ki halor ka phang “Ka jinglong kongsan jong ka Mei Mariang”. Ngi kum ka seng ngi ruh ngi sngewthuh ia ka jinglong kongsan jong ka Mei Mariang lyngba ki nuksa ba ki myn barim jong ngi ki la leh lypa, ym tang da ki jingkren ki nong ia shim bynta ha kane ka program, kum ki nong ia shim bynta phi ruh phi dei ban sngewthuh, ba ngi kiba neh ha ka jingngeit tynrai katno ngi ruh ngi ieid, ngi im bad ngi iaid kat kum ka bor jong ka Mei Mariang, dei ha kata ka nongrim ngi iai iaid ter shi ter kum shi bynta ban makhane ia ka Mei Mariang lyngba ki jinghikai ba ngi la ioh pateng naduh ki Kni ki kong, ki pa tymmen ki mei tymmen, ki pa ieid ki mei ieid kumta ter ter.
Kaba sngew phylla ka long kat kum ka rynsan kaba ki ong ka long ka “rynsan iathir” i mat ka la kylla long noh ka “rynsan iather”. Haba ioh sngew ia ki kyntien napdeng ki nongiashim bynta katno ngi sngew bitar ia ka jing rkhie bad ka rukom kren arsap ka jong ki ia ka rukom pyniaid bad ka rukom ngeit ka jong ngi kum ka Niam Tynrai. Na ka liang jong ka seng ngi da pyrshah eh ia ka rukom kren bym shongnia jong u rangbah Reading War, u ba long kum u Advocate bad u ba dei ruh u Advisor jong ka Environment Coordination Committee jong ka Elaka Sutnga. Lada ngi pyrkhat bad pynshongnia bha ia ki kyntien ba u la kren shaphang ka “Shad Sukra” bad ka “Shad Behdieñkhlam” kala long noh ba u krenbeiñ ne kheiñpoh ia ka Dustur ka Riti ka jong ngi kum u khun Hynniew Trep Hynniew Skum, kumta ka bor khmih ia ka aiñ ka dei ban pynduh noh ia ka License Practice jong u kum u Advocate. Balei kum u Advocate u don seh ka bor ban krenbeiñ bad kren ñiewpoh ia ka rukom ngeit jong kiwei ki jait Niam, hato u don ka hok ban kren kumta, haba u briew u ba la pule ia ka aiñ, ha ka Article ne ka Section jong ka aiñ kaba katno kaba ai bor ia u ban krenbeiñ ia kiwei. Ngi ngeit skhem namar ba u la dep pule ia ka aiñ, u tip khambha ma u ia ki kyndon jong ka aiñ, bad ka aiñ kam shah iano iano ban krenbeiñ ia kiwei. Ngi nud ban ong ruh ngi tip khambha ha kaba iadei bad ka Dustur ka Riti ka jong ngi namar ka Dustrur ka Riti ka iaid ryngkat ryngkat bad ka jingleh niam ka jong ngi. Lyngba ki rukom kren ki jong i rangbah Reading War ha kane ka “Rynsan Iathir” ngi sngewthuh shai kdar ba ma u ym tip ei ei shaphang ka jingmut jong ka “Shad Sukra” bad ka “Shad Behdieñkhlam”. Ngi sngew lehrain ban ong kat u Advocate u ba dei na ka Ri Jaiñtia ym tip ei ei shaphang ka Dustur ka Riti bad khamtam ia ki jingmut jong ka jingshad Niam Tynrai ki jong ngi. Ki rangbah ki la ong “i jingtip iba rit eh ki long kiba ma haduh katta katta”.
Ka jingkren bym kheiñ snep ki jong i rangbah Reading War lyngba ka Channel 4front Media ha ka 25 tarik Lber 2025, kila long shisha ki kyntien kiba pynmong ia ki Daloi, ki Lyngdoh, ki tymmen ki san, ki rangbah longsan, ki kmie ki kpa, ki khun samla bad kiwei kiwei.
Kumta lyngba ki kyntien ba la kren pynmong ki jong u, na ka liang jong ka Seiñ Kyntu Seiñ Raij 12 Daloi kam pat sngew hun ia ka jingpanmap bad pynshai kumba phi kren lyngba ki Video phi dei ruh ban pynshai bad pan map lyngba ka Video.
Discussion about this post