Ka Dorbar Chnong Moodymmai, West Jaiñtia Hills District dei sñiaw sarong wow yoh biang ya u MDC uwa man u khon ka chnong, u Jessie Suiam uwa da jop biang ha ka sieñ wa ar wow mihkhmat cha ka JHADC, hei janmiet ka 31-03-25 da pynkup burom ko ya oo ha ka yalang wa da pynman ha yung hall ka chnong Moodymmai.
U Jessie Suiam toh uwa mihkhmat na ka Constituency Moodymmai Nongkhroh, ka sieñ wa jop nyngkong u toh ha u snem 2019 wei kawa ar won ha uni u snem 2025.
Ha ka yalang wa pynlai da ka F. Lytan, neiliang u Secretary ka chnong Moodymmai, u Newmoon Shangpliang ong u, i noh synniang u Jessie Suiam ha ki snem wa da lai ymtoh de iwa ke la neibynta ki Balang waroh ar tylli wa em ha kani ka chnong, ya ka chnong ka thaw, ki dong ki chnat, ki seiñ kur wa kiwi ki bynta yong ka imlang sahlang, deiwa yooluti leh wow dang lehbha chooh chooh ha ki snem wow wan.
U Waheh Chnong, u Emris Ksoo hawa klam ong u i jop biang u Jessie Suiam wanrah biang u sa chisien yei burom i naam ka chnong Moodymmai wa kamjooh ya kiwi ki chnong wa haap hapoh i pait i yoo yong oo.
I pynkup burom ka chnong man i leh kam chibynta yow pyn-eh-daw, pyn-eh-nasib ya oo yow yoh u i chait i khiah, i stat i chemphang neibynta wow chakri u ya ka Constituency wa ka Ri Jaiñtia hi waroh kawi.
Neiliang u MDC, u Jessie Suiam won hawa klam da sñiawngooh u ya waroh kiwa embynta wow pynjop biang ya oo kam u MDC, kamwa da emlang u wa ka sorkar hadooh wa kut ka samoi krehkaam, yooluti u leh wa ha kani ka kynti dei pyn-eh-daw ka chnong wa ka sorkar kawa em u neh biang ko 5 snem pura.
“Nga kam uwa yakhun, nadooh ka 24 tarik ka sngi ñiaw Vote da mylliñ lut O waroh, ym em de ap O ya kiwa klambeiñ wa kynnoh kynthoh ya nga ha ki rukom waphær waphær, wei manda dep jop kyruiñ ki khmat O cha u Blai wow e ngooh ya oo, hao toh i kyrchaan yong phi kam ki paidbah, tangwa nyngkong hi e ngooh O yow Blai neibhah O wa pynjop chwa ya nga,” ong u Jessie Suiam.
Khana haroh u wa ha ka sien wa jop nyngkong u leh e ngooh hi u yow Blai, wei i jop biang u ha kani ka kynti leh toh wa emlang u Blai chirup wa oo, neibhah yoo u wa han hei bor wa khian leh pynkreh kaam hok u ya ki Scheme wa yoh u cha ki paidbah, wa hanla ki bru wym yaroh ki leh ya u Blai, oo won e u yei yaroh.
Heiyatoh won wa ka luti chaphrang kam u MDC kular u wow kreh wow pyndep biang yei kaamram wa da pynkham ha oo. Kyntu u leh ya ka chnong wow pynyoo u yahluti ko kiyi ki kaam wa toh u leh hapoh ka chnong ka thaw, heiwa oo won kam u MDC u bood u nadien chirup chirup yow jop yeiwa mut wa mang.
Heijooh i por leh wow ya e yumutlang ya kawon kawon ka kaam wa bha haka imlang sahlang.
Discussion about this post