U Bajinder Singh uwa tip leh kam u ‘Yeshu Yeshu Pastor’ uwa yalap niam Christan uwa pawnaam bha khamtam ha ki rynsan Social Media uwa kam wa ye u pynchait ya kiwa kjut wa chitom nadooh kiwa em Cancer, AIDS wa kiwi de ki jait kjut, ynne ka sngi ka yung bichaar ka Mohali da phah kset ka oo waroh chi rta heiyatoh wa ka mukotduma wa da e pyrchah ya oo wa slaitbor u ya kawi ka bru.
Ini i kaam slaitbor toh iwa da leh u nadooh u snem 2017 heiwa da nood ka kynthai wow wan booh ujor ha u snem 2018 wei ka yung bichaar hawa rai pynrem ya oo da pynngat ka oo hapoh ka Section 376, 323 wa 506 ka IPC.
Ka kynthai kawa da chah slaitbor da ong ko wa uni u bru toh u ‘Psycho’ wei lada yoh u wow mih na patok daw leh biang u yei jooh, kamtæ ka da yaleh ko ya ka mukotduma yow dawa phah kset oo waroh chi rta wei ynne ka sngi man ko i jop ym du ya ka tangwa ya kiwa boon ki kynthai.
U muktiar kani ka kynthai ong u wa u Bajinder Singh toh uwa chim kabu ya ki kynthai hei pyrtuid ka niam wei da yooluti u wa kiwi ki kynthai kiwa da maad yeini i jooh daw chlur ki wow wan chakhmat yow khana yeiwa jia ya ki.
Ka kynthai wa chah slaitbor da khana ko wa da tipmit ko ya u Bajinder ha u September 2017 wei da sdang u wow leh u tba khlem akor wei da pynbiej u ka wa daw yarap u ya ka wow lai cha baar ri heiwa da slaitbor u ka leh boonsien wei da riñ Video u ka leh deiwa maham wow thaad madan ka lada ym leh ko katkam wa ong u.
Hadien wa chah ujor u, u Bajinder da yoh jamin u wei da pteiñ u yei lai yalap niam kam uwa seiñ ya ka Church of Glory and Wisdom kawa da sdang u ha u snem 2016.
Chwa wow sdang u ya kani ka Balang u, da chah kset patok u heiyatoh wa i kaam pynyap bru wei manda lait patok u da kylla niam na ka Hindu cha ka Christan.
Hawa pynman yaseiñ da jooh tem u yei sur ‘Mera Yeshu Yeshu’ wei da tip noh ya oo kam u Yeshu Yeshu Pastor.
Kam wow pynkynmoo wa ini wa dep da poor leh i Video wa dat u ki ki bru wa krehlang wa oo.
Discussion about this post