Da pyndep ya ka Chaad Tyllu wow yoh i kyrkhu waroh ki khon ka Elaka Mynso

Kamwa jooh man khlieh ki snem, ynne ka sngi leh ki khon Niamtre ka Raij Mynso da pyndep ki ya ka Chaad Tyllu kawa man ka lehniam chwa wow hiar rep ki cha hali wei ya kani ka lehniam da pynman ha Pdeiñ Tyllu, Lumphlang, Mynso-A, West Jaiñtia Hills.

Kani ka lehniam ha uni u snem da sdang ko nadooh ynnin i miet da i Chaad Synyaaw na Loom Lariang wei da kynrood kajiak chisien dei dien hadooh wa poi ha Madan Dieñtyllu chirup i tem ya ka ksiñ, ka lakudiah wei put ya ka chawiang.

Chwa wow pynman ya ka lehniam Chaad Tyllu ynne ka sngi, da em ka yalang wa pynlai da u HB War uwa man kam u President ka Seiñraij Mynso, heiwa ka MDC ka thaaiñ, ka Laiawanlamjinghun Khynriam da man ko kam ka kongsan hei emlang u Kamnipaia Challam kam u symbood kongsan, u Dolloi ka Elaka Mynsoo, u K. Myrchiang wa kiwi.

Hawa e i klam ha kani ka yalang, u Kamnipaia Challam da ong u wa kani ka lehniam chwa wow hiar rep toh ym du wow yoh i kyrkhu ya ki khon ka Niamtre tangwa yong ka Elaka wa ka Raij hi waroh kawi.

Khut sñiawbha ka Seiñraij Pammanik cha ka Chaad Sukra 2025

April 4, 2025

Pynman ka Kur Nongpluh Pyllun ya ka yachemlang wa ynñiaw ha Moodymmai

April 1, 2025

Da kyntu u leh ya ka MDC ka thaaiñ wow e kyrchaan ya ka Seiñraij kawa pait wa yoo wa pynneh pynsah ya ka dustur riti.

Neiliang ka Laiawanlamjinghun Khynriam kam ka kongsan da ong ko wa e wa kani ka luti u neh ko ha ka pateiñ wa ka mynried neibhah chwa hiar u rep emkaam bha wow kyruiñ cha u Blai khnang wow kyrkhu u ya waroh.

Da ong ko wa e wa kani ka lehniam u wanrah ko yei yatylli khlem em i sñiawphær ha ka niam ka rukom wow man i yahluti ya ka mynried wow yieñ skem khlem i kulmar i kajia wow man iwa jop hei bha i miat.

Da kular ko leh wow yaklam ha JHADC wow wanrah ya i myntoi cha ka Seiñraij Mynso.

Da yoh leh ya ki kyntien Ngoohblai na ka E. Sungoh, i klam na u Hamjhan Dkhar wa ki kyntien khublei na u Pynhunmi Chen uwa man u Secretary ka Seiñraij Mynso.

Hadien ka yalang, ki khon khynroo khyllood da chaad ki iwa man chibynta yong kani ka lehniam deiwa ksoh-kti lang hei kieh ka chawiang, ka ksiñ wa ka lakudiah wa i sur rwai na ki manbei wa manpa.

Manda dep i chaad ki khon ka Raij da pyndep won ki ya ka Kñia Syiem Tyllu hapoh i pait i yoo u Dolloi, u Pator wa kiwa heh wa sian heiwa da kñia da u sniang khian.