Hadien i ujor ki paidbah na kylleiñ ki chnong wa duna kilo u khoo rachon wa yoh ki na kiwa saam kho rachon ha ki chnong ki thaw iwa da ktah ya ki khamtam kiwa wan na ki manyung wa duna hei yoh i laa, kamt ynne ka sngi ka Jaiñtia Student Union – Central Body hapoh i yahkhmat u General Secretary, u Nielkee Mukhim, u Ryngkat Diengdoh u Vice President JSU, u Phonelang Surong u President ka JSU Mynsngad Unit da lai ujor ki cha u DC ka West Jaiñtia Hills District u Abhinav Kumar Singh, wa toh u chimkhia u hei yatoh weini neibhah wa ini da ktah bha ko ya kiwa baam khoo rachon neibhah wym yoh khoo de ki katkam i hok wada mang ka sorkar ya ki.
Hei pyrchang ka JSU wow lai thooh yutip na kiwa saam rachon (Dealer), ki leh da kynnoh ki wa u khoo wa yoh ki duna u deiwa pynyoo i thaw kilo wa duna kilo u khoo ha ka chi churia, tangwa ym em won khana ki la u khoo wa yoh lut ki waroh man u bnai biang kilo hi u mo kamwa da mang cha ki paidbah wa toh u yoh myntoi wot hawa em ki churia wa duna kilo.
Hei yatoh weini ka seiñ da kyntu ko ya u DC wow phah lai sylli ha ki bor wa toh u pait, wei oo leh da kular u wow chimkhia yeini.
U Phonelang Surong uwa man leh u Secretary Chnong ka Mynsngad da khana u wa neiliang ka chnong yong ki leh man i por jooh lai pyntip ki chaka chnat Supply neidaw wa ki paidbah yong ka chnong Mynsngad ood ki hajrong i duna i yoh khoo tang ym em leh ki iyi iyi, wei ha kani ka kynti dei yakrehlang wa ka JSU da mih biang ki wow ujor.
Discussion about this post