U khynnah khynroo wa tip kam u Welcome Rasmut uwa na Meghalaya da chem biang oo na Tamil Nadu ha ka 16 tarik hadien wa wiar u na Bengaluru hei step ka 12 tarik uni u bnai.
U Welcome Rasmut toh uwa na chnong Ummulong, West Jaiñtia Hills uwa da em 16 snem i rta wei da wiar u na Kammanahalli, Bengaluru, Karnataka.
Ya uni u khynnah da chem biang ha ka 16 tarik na Tamil Nadu da uwi u Pastor wa ki lok yong oo kiwa da yarap wow lai booh oo cha ka Child Welfare Committee (CWC) Krishnagiri, Tamil Nadu, wei da e kti noh oo cha kiwa ha-yung ha-sem u ynnin ka 25 tarik.
Uni u khynnah da wiar u heipor step ka 12 tarik hadien wa mih u na yung yow lai phet step wei da suba wa da bakla luti u iwa da pynman ya ka yung ka sem u wow lai pyntip cha ki pulit wei neiliang ka seiñ KSU Bengaluru Unit da lai pyntip ki cha ki laad pathai khubor wa ha ki Social Media.
Lyngba i ya krehlang da kiwa boon ki seiñ wa ki bru samen, da yoh khubor wa uni u khynnah dapoi u cha Tamil Nadu wei da chem ya oo da uwi u Pastor uwa da chimkhia wow pynpoi ya oo cha ka thaw sumaar ki khynnah ka Children Welfare Committee wa em ha Krishnagiri, Tamil Nadu, kawa da pait wei sumaar bha ya oo hadooh wa da yoh pdiang noh da kiwa ha-yung ha-sem u.
Neiliang ka seiñ da e khublei ko ya u Iada Martin Marbaniang, u Pastor A.S. Nongrum yong ka KJCF Bangalore, ki paralok wa sah marjan, ka NPP Ummulong Youth Wing, ka CWC Jowai, ki pulit na Banaswadi Police Station, ryngkat kiwa ha-yung ha-sem kiwa da chimkhia wow pynpoor ya ka khubor yow thooh ya u Welcome.
Kiwa ha-yung u Welcome Rasmut da e ki yei sñiawngooh wa khroo cha waroh kiwa da yarap wei kiwa kynmoolang ya ki hei duwai wei kiwa da kyrchaanlang ha kam ini i por wa maad ki yei eh i chitom.
Discussion about this post