Ka President ka ri India, ka Droupadi Murmu ynne da saam ko ya 4 tylli ki Padma Vibhushan, 10 tylli ki Padma Bhushan wa 57 tylli ki Padma Shri Awards neibynta u snem 2025 ha ka yalang Civil Investiture Ceremony-I wa da pynman ha Ganatantra Mandap ka Rashtrapati Bhawan, Delhi.
Napoh ka jylla Meghalaya da yoh ya ka Padma ShriAward da u Prof. David R. Syiemlieh neibynta ka Literature and Education.
Da sakhilang yeini da u Vice President ka India, u Jagdeep Dhankhar, u Prime Minister, u Narendra Modi, u Union Home Minister, u Amit Shah wa kiwi ki Montri ka sorkar pyrdi deilang kiwa chah khut sñiawbha.
Kiwa yoh ya ka Padma Award daw lai lehwarom ki ha ka National War Memorial mynstep i step wei daw lai ki leh cha ka Rashtrapati Bhawan wa ka Pradhanmantri Sangrahalaya.
U Prof. David R. Syiemlieh man u leh kam u bru chemphang (Scholar) heiyatah wa ka History wa Culture ka North East wei da man u leh kam u Chairman warim ka UPSC.
Da kha ya oo ha ka 22-01-1953 ha Mutrapore, Sibsagar, Assam, wei da pyndep u ya ka Graduation deilang ka Honours ha ka History ha u snem 1974 na St. Edmund’s College, Shillong. Wei da pyndep u ya ka M.Phil ha u snem 1980 wa ka Ph.D ha u snem 1985 na North-Eastern Hills University.
Da sikai u ha St. Edmund’s College (1977-1979) wa NEHU (1979-2012) wei da ksoh u ya kiwa boon ki kyrdan nadooh u Dean Students’ Welfare; u khlieh ka Department of History; Controller of Examinations; da jooh man u leh kam u Registrar wei kam u Pro-Vice-Chancellor. Da thung ya oo kam u Vice-Chancellor ka Rajiv Gandhi University, Arunachal Pradesh ha u October 2011. Da man u kam u Member ka Union Public Service Commission ha u snem 2012 wei ha u snem 2017 da thung ya oo kam u Chairman ka UPSC.
U Prof. Syiemlieh da pynmih u ya ka kot wa nyngkong u wa tip kam ka British Administration in Meghalaya: Policy and Pattern, Heritage Publishers, New Delhi ha u 1989. Hadien won da pynmih u ya ka Survey of Research in History on North East India 1970-1990.
Kiwa dang dep pynmih u toh kawa tip kam ka On the Edge of Empire: Four British Plans for North East India wa ka Layers of History: Essays on the Khasi-Jaintias.
Da tip leh ya oo kam uwa thooh bniah wei uwa chem leh ya ka sngi yap wa ki sngi wa khaddooh u Tirot Sing, u Syiem ka Hiam Nongkhlaw.
Discussion about this post