Ka Behdieñkhlam ka Raij Kongwasan Chyrmang, kawa nyngkong dooh man-u-snem hapoh Ri-loom Jaiñtia, da pynkut ka ynne ka sngi hapoh ka Syiem Aitnar hadien 3 sngi lynter wa da lehkmen ya ka itæ nadooh ka 29 tarik u April.
Ha kani ka sngi pynkut wa da pynman ha Aitnar yong ka chnong Chyrmang, u Lahkmen Rymbui kam u MLA ka thaaiñ da wan sakhi u kam u kongsan hei emlang u Dolloi ka Elaka Jowai, u Puramon Kynjing, kiwa yahkhmat wa ki bru mihkhmat na ki Raij waphær waphær, kiwa chah khut sñiawbha wa kiwi.
I lehniam ha kani ka sngi pynkut da sdang ki nadooh i por step dei lai chaad kut ki thlu yung wei bood sei lai chaad ha yung Langdoh da ka Chyrmang Neiñ, ka Chyrmang Wah wa i seh bhang.
Heipor noh chariñ sngi won ki khon ka Raij da wanrah ki ya 7 tylli ki Rong ki Rot ha Aitnar dei chaad kmen wei kyriaw deiwa chimbynta kynthai wa chynrang ha deilang i sur yong ki bom, ki bhuri.
U kongsan hawa klam da e khublei Behdieñkhlam u ya waroh ki khon ka Raij wei kyrmen u leh wa i pyndep ya kani ka Behdeiñkhlam u wanrah ko i kyrkhu ha ki manyung, u wanrah ko i chait i khiah wa i suk i saaiñ haka imlang sahlang.
U Dolloi won ong u katwon man iwa sñiawsuk wa u Langdoh Kongwasan da ye u wow pyndep ya kani ka Behdieñkhlam chwa wow hiar rep hiar riang dei kyrmen yow bha i rep i riang, wei yow dap kot u khoo u kba.
Yooluti u leh wa u Blai kynrad wow nang theh chooh chooh u i kyrkhu ha ki bynta waphær waphær la hei kamai kajih, ka puræ puthi, u yoh yei chait i khiah wei wow nangroi nangpaar.
Discussion about this post