Ka Sophia Niang kawi na kiwa lai puræ ha Government Girls’ Higher Secondary School, Jowai kawa da yoh psiah ha ka thup Top-10 yong ka Result HSSLC 2025, Commerce Stream wa da pynbna da ka MBOSE ynne ka sngi deiwa yoh ha ka 6th Position, da pynsñiaw ko yei sñiawngooh yow Blai kamjooh ya ka bei u pa wa kiwa sikai kiwa da yarap pynpoi ka ha kani ka kyrdan deiwa ong wa kani ka kyrdan toh iwa da yooluti ko da slem wei heipor wa yakhun ko ya ka Exam SSLC 2023 leh da thrang bha ko u yoh psiah ha ka thup Top-20 tangwa da dooh noh ko du 5 Marks donhi.
Wei i dooh yong ka ha ka SSLC ong ko ye u man wa u Blai leh dang kwah chooh chooh u ya ka wow kreh chitom kamtæ dei pteiñ kreh chitom kattæ da yoh ko yeiwa thrang.
Khana haroh ko wa nadooh Class 8 wa wan puræ ko ha kani ka skur yoo ko wa ka yakhun yoh nyngkong man iwa biang bha ya ka, wei i joor ka kani ka yaleh ha kani ka skur yarap bha ko leh ya ka u ku hadooh wow yoh khait ko ya u soh i jop wa pynhun ya ka ynne ka sngi.
Ha u snem 2023 wa pyndep ko ya ka SSLC da pynmih leh ya ka Commerce Stream ha kani ka skur kamtæ da pteiñ ko yei puræ ha kani hi ka skur dei sñiawkmen wow yoh man kam kawi na ki khynnah skur wa nyngkong ha ka Commerce Stream.
“Wei hanla hei lai luti chisnem chisnem maad i yei eh i khoo heiyatoh ki Classroom wa kiwi, tangwa dei kreh chitom wa kiwa sikai ha chirup i emlang u Blai, hei khaddooh yoh i yei jop kamwa man kattæ,” ong ka Sophia.
Hawa klam e mynsien won ya ki para khynnah skur ong ko, “Ye i wow yoh i stat la ha ka skur wa duna i lut i sep wei phi kiwa yoh lai skur heini khamtam kiwa wan na ka yung wym joh bor u lai cha ki skur wa syad man phi kiwa embhah tam ha kani ka juk syad bai skur.”
Ong haroh ko toh u sñiawngooh wei kynmoo ya ki bei ki pa kiwa da kreh chitom neibynta u phah skur, khamtam ya kiwa wan na palatsor kamwa ka leh wan ko na ka chnong wa cha kdong tam ka jylla Meghalaya ka chnong Huroi.
Kamtæ kyntu ko wow bood ki ya ka nongmuna yong ka wei wym toh u pynsepai ya ka laad yoh lai skur, neibhah dang em chiboon ki khynnah wym yoh laad u lai skur.
Hawa ban joor wow man ki bru wa sñiawngooh wei burom yow Blai ong ko, “Hao em i ya ki bei ki pa wa kiwa sikai kiwa yarap ya i tangwa emkaam won i ka bor wa rap khroo itæ toh na u Blai, neibhah wan i cha pyrthai toh lyngba yong oo wei im i kamwa man kattæ leh toh lyngba i emlang chirup yong oo”.
Da pynrap haroh ko deiwa ong kreh chitom wei chaniah ha u Blai yow poi cha ka thong, neibhah ka ktien ong ko i ngait khlem i leh man i wym em yumut.
Discussion about this post