Ka All Meghalaya Traditional Wrestling and Pankration Association hapoh i yahkhmat ka Anita Songthiang kam ka President wa u Lameshwa Majaw kam u Team Leader da chimbynta ki ha ka All India Traditional Wrestling & Pankration Federation Cup, 2025 wa da pynman ha Neelgiri Multi Purpose Indoor Sports Hall, Jaipur, Rajasthan wa da pynman da ka Rajasthan Traditional Wrestling & Pankration Association deiwa ya krehlang wa ka All India Traditional Wrestling & Pankration Association (AITW&PA) kawa da pynman nadooh ka 1 tarik hadooh ka 4 tarik uni u bnai.
Ki jait yalehke toh kiwa tip kam ki Traditional Wrestling yong kiwa boon ki ri ka pyrthai kam ka Alysh (Belt Wrestling), ka Pankration Athlima (Amateur Mixed Martial Arts), ka Pankration, ka Palesmata, ka Palhvani, ka Polydamus wa ka Mas Wrestling.
Kiwa yalehke ka Meghalaya da yoh ki 610 Point yow rah yei naam Champion wei da bood da ka Haryana hei wa ar, ka Punjab hei wa le wa ka Delhi hei wa soo.
Kiwa yalehke ka Meghalaya da yoh ki 44 tylli ki takma ksiar, 30 tylli ki takma rupa wa 25 tylli ki takma tama iwa dapoi waroh 99 tylli.
Kani ka AITW&PA Federation Cup man ko leh kam ka Selection Trial neibynta ki U-15 wa Senior Athletes yow mihkhmat ha ka Asian Belt Wrestling Championship kawa daw pynman ha Talkatora Indoor Stadium, Delhi nadooh ka 21 hadooh ka 24 tarik uni u bnai wei da jied ya ar ngut kiwa na Meghalaya kitæ u Bankhrawnam Ryndong -60 Kg (U-15) wa ka Lorenza Songthiang (Senior Women Category) yow mihkhmat ki ya ka India.
Discussion about this post