Ka Mupliang SC da jop suk ko ya ka NEAU CC (ATS) da 9 Wicket ha ka yalehke ynne ka sngi yong ka District Cricket League 2025 wa pynlai da ka West Jaiñtia Hills District Cricket Association.
Ya ka kylla khlem da jop da ka Mupliang kawa da jied wow kawang bol nyngkong chwa heiwa ka NEAU da lai ko wow kamai du 63 Run donhi deiwa dooh lut waroh ki Wicket ha ka Over wa 14.3. U Arman B Marak da kamai u 17 Run (Not Out) wa u Alban Presley R Sangma 16 Run wei man ki du ki kiwa ye u kamai palat ya 10 Run. U Defender Dhar (C), uwa kawang bol yong ka Mupliang da yoh u wow pynhaap samen 5 Wicket na ki 4 Over.
Ka Mupliang hawa beh ya ka thong da ye ko u pynjop suk deiwa yoh 65 Run na ki 11.1 Over deiwa dooh chi Wicket donhi. U Mewan Phawa da kamai u 21 Run (Not Out) na ki 34 bol deiwa dat leh ar tylli ki 4 Run, u Oniwanker Sna won da yoh u 16 Run (Not Out) na ki 14 bol deilang 3 tylli ki 4 Run wa u Byforcestar Dhar uwa da kamai 16 Run na ki 19 bol deilang 2 tylli ki 4 Run. U Achigrim W Sangma, uwa kawang bol yong ka NEAU da yoh u pynhaap chi Wicket na chi Over.
U Defender Dhar yong ka Mupliang deiwa lehbha da ka bol da yoh u yei naam Man of the Match.
Deiwa jop ynne, ka Mupliang SC da em ko hei wa ar hei boon Point yong ka Pool A deiwa jop ko soo sien na waroh 5 tylli ki yalehke, ka NEAU CC (ATS) won da jop ko du chisien wei rem soo sien na ki 5 tylli ki yalehke wei da man wa san ko ha ka Pool A.
Ka yalehke mynstep toh hapyrdi ka Phramer CC pyrchah ya ka Khliehtyrshi SC heipor 8:30 i step.
Ya ka Digital Live Score yong kani ka League ye phi u peit ha https://cricheroes.com/tournament/1406553/wjhdca-district-cricket-league-2025
Discussion about this post